امریکا کی آن لائن نیلامی کمپنی پراپسٹور پر ایک ہیٹ نیلامی میں 6 لاکھ 30 ہزار ڈالر میں فروخت ہو گیا ہے۔
ایک آن لائن نیلامی میں ایک ٹوپی (فیڈورا-مخصوص قسم کی ہیٹ) چھ لاکھ سے زائد ڈالر میں فروخت ہو گئی ہے، اس کی خاص بات یہ ہے کہ مشہور فلم ’انڈیانا جونز‘ کے ہیرو نے اسے فلم میں پہنا تھا۔
یہ ہیٹ 1984 کی فلم ’انڈیانا جونز‘ اور ’دی ٹیمپل آف ڈوم‘ میں اداکار ہیریسن فورڈ نے پہنا تھا، یہ فلموں میں اسٹنٹ کا کام کرنے والے ڈین فیرانڈینی کی ملکیت تھا اور انھوں نے بھی فلم کے ان خطرناک مناظر میں یہ پہنا تھا جن میں انھوں نے ہیریسن فورڈ کے ڈبل کے طور پر کردار کیا تھا، ان کا انتقال گزشتہ برس 2023 میں ہوا تھا۔
پرانی یادگار اشیا کی نیلامی کرنے والے کمپنی پراپسٹور نے کہا کہ فلمی ہیرو کا یہ یادگار ہیٹ ان 450 اشیا میں سے ایک تھا، جو ’یو ایس انٹرٹینمنٹ میمورابیلیا لائیو آکشن‘ میں بولی کے لیے پیش کی گئی تھیں۔
کمپنی کے مطابق یہ ہیٹ انڈیانا جونز سیریز کی دوسری قسط کے لیے خاص طور پر بنایا گیا تھا، اور اس فلم کے مناظر، فلم بندی کے دوران لی گئی تصاویر، اور سری لنکا میں شوٹنگ لوکیشن پر ہیریسن فورڈ کی جو فوٹیجز دستیاب ہیں، ان میں دکھائی دینے والے ہیٹ سے بالکل میچ کرتا ہے۔
نیلامی کی فہرست کے مطابق ایلسٹری اسٹوڈیو میں ایک سین شوٹ کیا گیا تھا، جس میں ایک کان کا منظر تھا جس میں ہیریسن فورڈ کان کنی والی گاڑی میں فرار ہوتا ہے، اس منظر کے علاوہ امریکا میں فلمائے گئے دریا والے سین کے ساتھ بھی یہ ہیٹ میچ ہوتا ہے۔ (واضح رہے کہ کان کے اندر والے منظر میں بالی ووڈ ولن امریش پوری نے بھی اداکاری کی تھی)۔
