گوہاٹی : بھارتی ریاست منی پور میں باغیوں کے پولیس اسٹیشن پر حملے کے دوران سکیورٹی فورسز کے ساتھ مسلح جھڑپ میں 11افراد ہلاک ہوگئے۔
غیرملکی خبر رساں ادارے ادارے رائٹرز کی رپورٹ کے مطابق کوکی قبیلے سے تعلق رکھنے والے ایک مسلح گروہ نے بوروبکرا پولیس اسٹیشن پر حملہ کیا، پولیس نے جوابی کارروائی میں 11 باغیوں کو ہلاک کردیا۔
آسام سے ملحق ضلع میں کیے جانے والے حملے میں سینٹرل ریزرو پولیس فورس کا ایک سپاہی زخمی ہوا، تصادم تقریباً 45 منٹ تک جاری رہا۔ اس موقع پر مسلح باغیوں نے میٹی برادری سے تعلق رکھنے والے 3 سے 4 گھروں کو بھی آگ لگا دی۔
رپورٹ کے مطابق باغیوں نے جس پولیس اسٹیشن پر حملہ کیا اس کے قریب ایک کیمپ میں بےگھر ہونے والے افراد کی بڑی تعداد پناہ گزین تھی۔
پولیس کے مطابق حملہ آور ایک رکشہ میں سوار ہوکر آئے تھے، ضلع جریبام کے علاقے بورو بکرا کے اس پولیس اسٹیشن کو چند ماہ کے دوران کئی بار نشانہ بنایا جا چکا ہے۔
واضح رہے کہ ریاست منی پور گزشتہ کئی سال سے بدامنی کا شکار ہے، یہاں میتی اور کوکی برادری کے درمیان دیرینہ تنازعہ چلا آرہا ہے۔
تقریباً 32 لاکھ آبادی والی یہ ریاست مئی 2023 سے دو نسلی علاقوں میں تقسیم ہو چکی ہے، ایک وادی جس پر میتی کمیونٹی کا کنٹرول ہے اور پہاڑی علاقے کوکی کمیونٹی کے زیر تسلط ہیں، اس تصادم میں اب تک کم از کم 250 افراد ہلاک اور تقریباً 60 ہزار سے زائد لوگ بے گھر ہو چکے ہیں۔
