اسلام آباد : اشتہارات کے غیرقانونی ٹھیکوں کے ریفرنس میں سابق وزیراعظم یوسف رضا گیلانی پر 6اگست کو فرد جرم عائد کی جائے گی، عدالت نے یوسف رضا گیلانی کی آج حاضری سےاستثنیٰ کی درخواست منظور کر لی۔
تفصیلات کے مطابق احتساب عدالت میں اشتہارات کے غیرقانونی ٹھیکوں کے ریفرنس پر سماعت ہوئی ، یوسف رضا گیلانی سیکیورٹی خدشات کے باعث پیش نہ ہوئے، یوسف رضا گیلانی نے درخواست کی کہ سیکورٹی خدشات کے پیش نظر پیش نہیں ہوسکتا۔
جس پر عدالت نے سابق وزیراعظم یوسف رضا گیلانی پر فرد جرم کی کارروائی موخر کرتے ہوئے آج حاضری سےاستثنیٰ کی درخواست منظور کر لی اور 6اگست کو فرد جرم عائد کرنے کی نئی تاریخ مقرر کردی۔
بعد ازاں احتساب عدالت نے آئندہ سماعت پر کیس کے تمام ملزمان طلب کرتے ہوئے سماعت 6 اگست تک ملتوی کردی۔
گذشتہ سماعت میں عدالت نے سابق وزیر اعظم یوسف رضا گیلانی پر فرد جرم عائد کرنے کا فیصلہ کرتے ہوئے تمام ملزمان کو 2جولائی کو طلب کر لیا تھا۔
مزید پڑھیں : سابق وزیر اعظم یوسف رضا گیلانی پر فرد جرم عائد کرنے کا فیصلہ
یاد رہے قومی احتساب بیورو (نیب) نے سابق وزیر اعظم یوسف رضا گیلانی کے خلاف اپنے دور اقتدار میں اختیارات کے غلط استعمال کا ریفرنس درج کیا تھا۔
نیب حکام کا کہنا تھا کہ یوسف رضا گیلانی نے یو ایس ایف (یونیورسل سروس فنڈ) سے تشہیری مہم چلانے کی ہدایت کی، سابق سیکریٹری آئی ٹی فاروق اعوان نے اختیارات کا ناجائز استعمال کرتے ہوئے تشہری مہم چلائی، ملزمان کے اقدام سے قومی خزانے کو 12 کروڑ روپے کا نقصان اُٹھانا پڑا۔
قومی احتساب بیورو کی جانب سے جاری کردہ نوٹیفکیشن کے مطابق سابق انفارمیشن سیکریٹری فاروق اعوان، سابق پبلک انفارمیشن آفیسر سلیم، حسن شیخو، حنیف اور ریاض پر بھی سابق وزیرِ اعظم کا ساتھ دینے کا الزام ہے۔
