برطانیہ: ویک اینڈ کی رات دیو قامت جمپنگ سلائیڈ کے گرنے سے 8 سے زائد بچے شدید زخمی ہوگئے ، سانحے میں مجموعی طور پر 20 کے لگ بھگ بچے متاثر ہوئے۔
تفصیلات کے مطابق یہ اندوہناک واقعہ برطانیہ کے علاقے سرے کے ورکنگ پارک میں پیش آیا جہاں بچوں کے لیے آتش بازی کا اہتمام کیا گیا تھا اور اس موقع پر شہریوں کی کثیر تعداد جمع تھی۔
عینی شاہدین کے مطابق سلائیڈ 20 سے 25 فٹ اونچی تھی اور حادثے کے وقت اس پر چالیس کے قریب بچے موجود تھے ، سلائیڈ کے گرنے سے کم از کم 15 سے 20 بچے اوپر سے نیچے گرے ، جن میں سے آٹھ شدید زخمی ہوگئے۔
پولیس کے مطابق سانحہ شام سات بجے کے بعد پیش آیا اور پولیس نے اسے بڑا حادثہ قرار دیتے ہوئے جائے وقوعہ پر ایمرجنسی نافذ کردی۔ حادثے کے فوری بعد پیرا میڈکس اسٹاف جائے حادثہ پر پہنچا اور بچوں کو طبی امداد فراہم کی گئی ۔
آٹھ بچے اس اندوہناک سانحے میں شدید زخمی ہوئے جنہیں فی الفور سرے کے علاقے میں واقع بڑے اسپتالوں میں منتقل کیا گیا۔ ایک بچہ انتہائی سنگین حالت میں تھا جسے ہیلی کاپٹر کے ذریعے اسپتال لے جایا گیا ۔
جائے وقوعہ پر موجود ایک عینی شاہد کا کہنا ہے کہ ان کے بچے نے ان سے اس سلائیڈ پر جانے کی اجازت مانگی لیکن ان کے اندر کی حس نے انہیں خبردار کیا کہ سلائیڈ پر بچوں کی تعداد زیادہ ہے اور یہ ان کے بچے کے لیے خطرناک ہوسکتا ہے لہذا انہوں نے اپنے بچے کو سلائیڈ پر جانے سے روک دیا اور چند ہی لمحوں میں یہ سانحہ پیش آیا۔
پولیس نے بچوں کو اسپتال روانہ کروانے کے بعد پارک کو عوام سے خالی کروا کر جائے وقوعہ کو سیل کردیا ہے اور سلائیڈ گرنے کے حوالے سے تحقیقات کاآغاز کردیا ہے۔
