کراچی : ماہ رمضان سے پہلے مہنگائی کے طوفان نے عوام کی چیخیں نکال دیں ، ڈیڑھ سو روپے ملنے والی پیاز 280 روپے کی ہوگئی جبکہ ٹماٹر اور ہری مرچ کی قیمت میں بھی ہوشربا اضافہ ہوگیا۔
تفصیلات کے مطابق رمضان المبارک سے پہلے ہی ملک بھر میں مہنگائی کا جن بے قابو ہوگیا، ےمنافع خوربےلگام ہے ، جس کے باعث عوام پریشان ہیں کہ روزہ افطار کیسے کریں گے۔
پھل اور سبزیوں کی قیمتیں آسمان سے باتیں کرنے لگیں اور گوشت کی قیمتیں بھی قابو سے باہر ہوگئیں۔
کراچی میں پیازکی قیمت دوسو پچاس روپے فی کلو تک پہنچ گئی جبکہ ادرک پانچ سواورلہسن چھ سو پچاس میں فروخت ہورہا ہے، ہری مرچ تین سو پچاس روپے کلو مل رہی ہے اور بھنڈیوں نے ٹرپل سنچری عبورکرلی ہے۔
لاہور میں ٹماٹروں نے ڈبل سنچری بنالی ہے اور لیموں بھی اسی روپے مہنگے ہوکر دو سوروپےکلوہوگئے۔
ملتان میں سبزیوں اورپھلوں کی قیمتوں میں اضافہ ہو گیا، کوئٹہ میں بھی شدید مہنگائی ہوگئی، پشاورمیں بھی پیاز دو ساٹھ اور آلو اسی روپے پر پہنچ گئے جبکہ ہری مرچ بھی تین سو روپے کلو ہوگئی ہے، عوام کہتے ہیں نئی حکومتیں مہنگائی اورہماری مشکلات میں کمی کیلئے اقدامات کرے۔
پورے ملک کی طرح اسلام اباد میں بھی مہنگائی نے رمضان سے پہلے ہی ڈیرے ڈال لیے ہیں، پیاز کا ریٹ ڈیڑھ سو روپے کلو مہنگا ہو کر 380 اور ٹماٹر 40 روپے کلو مہنگا ہو کر 180 سے 200 روپے کلو تک جا پہنچا۔
انڈے 40 روپے درجن مہنگے ہو کر 250 روپے درجن ہو گئے جبکہ کیلا 120 روپے درجن مہنگا ہو کر 260 جبکہ سیب 60 روپے کلو مہنگا ہو کر 330 روپے کلو ہو گئے ہیں۔
مہنگائی اور گراں فروشوں کے خلاف کارروائی نہ ہونے کے برابر ہے، عوام کا کہنا ہے کہ نگران حکومت نے بجلی اور گیس کے بلوں میں ظالمانہ اضافہ کر کے ان کی زندگی اجیرن کیے رکھی اب منتخب حکومت کے دور کے میں ہی مہنگائی کے نئے طوفان نے دہری اذیت کا شکار کر دیا ہے۔
عوام نے شکوہ کیا کہ ملک بھر میں ناجائز منافع خور بے لگام ہو گئے ہیں، اور من مانے ریٹ وصول کر رہے ہیں اور مہنگائی کنٹرول کرنے کے لیے اقدامات نظر نہیں آتے۔
