اسلام آباد: صدر مملکت نے کہا ہے کہ وزارتِ اطلاعات ریڈیو پاکستان کے 38 ملازمین کو 3 ماہ کے اندر پنشنری مراعات ادا کروائے، عدم ادئیگی کے باعث ریٹائرڈ ملازمین کے خاندان مشکلات کا شکار ہیں۔
اے آر وائی نیوز کے مطابق صدر مملکت عارف علوی نے کہا کہ ریڈیو پاکستان جیسے ادارے کو مالی وسائل کی شدید کمی کا سامنا باعث تشویش ہے، وزارتِ اطلاعات ریڈیو پاکستان کے 38 ملازمین کو 3 ماہ کے اندر پنشنری مراعات ادا کروائے، عدم ادئیگی کی وجہ سے ریٹائرڈ ملازمین اور ان کا خاندان مالی مشکلات کا شکار ہیں۔
عارف علوی نے کہا کہ ریڈیو پاکستان کو فنڈز کی فراہمی کا معاملہ اعلیٰ سطح پر اٹھایا جانا چاہیے، سیکریٹری وزارت اطلاعات 3 ماہ میں ادائیگی کے لیے مجاز اتھارٹی سے منظوری لیں، سیکریٹری وزارتِ اطلاعات وفاقی محتسب کو تعمیل کی رپورٹ جمع کرائیں۔
واضح رہے کہ سید پرویز حسین شاہ و دیگر 37 شکایت کنندگان نے محتسب کو اس سلسلے میں شکایت کی تھی، شکایت کنندگان کا کہنا تھا کہ مختلف تاریخوں میں ریٹائر ہوئے ، پنشن پیمنٹ آرڈرز تو جاری ہوئے مگر ادائیگی نہیں کی گئی۔
وفاقی محتسب نے ریڈیو پاکستان کو ریٹائرڈ ملازمین کو رقوم کی ادائیگی کا حکم دیتے ہوئے کہا کہ افسوس کہ سابقہ ملازمین بڑھاپے میں اپنے حقوق کے لیے مارے مارے پھر رہے ہیں۔ بڑھاپے میں ایک ایک پیسہ ریٹائرڈ ملازم کی بنیادی ضرورت ہوتی ہے.
ذرائع کے مطابق ریڈیو پاکستان نے محتسب کے حکم کے خلاف صدر مملکت کو اپیل دائر کی تھی، صدر مملکت نے وفاقی محتسب کے فیصلے کے خلاف ریڈیو پاکستان کی اپیل نمٹا دی، انھوں نے کہا کہ تسلیم شدہ قانون ہے کہ ریٹائرمنٹ مراعات ریاست کی جانب سے انعام نہیں بلکہ ملازم کو تسلی بخش خدمات کی وجہ سے حاصل ہونے والا حق ہے۔
