راولپنڈی: اڈیالہ جیل میں 85 سے زائد قیدی اور حوالاتی شدید بیمار ہو گئے ہیں، جیل ذرایع کا کہنا ہے کہ بیمار قیدی جیل سے باہر اسپتال منتقلی کے منتظر ہیں۔
تفصیلات کے مطابق اڈیالہ جیل ذرایع نے کہا ہے کہ متعدد مریض قیدی اور حوالاتی جیل سے باہر اسپتال منتقلی کے منتظر ہیں، یہ قیدی دل، گردوں، یرقان اور سانس کی تکالیف میں مبتلا ہیں۔
ذرایع کا کہنا ہے کہ اگر قیدیوں کو فوری طور پر اسپتال منتقل نہ کیا گیا تو ان کی زندگی کو شدید خطرات لاحق ہو سکتے ہیں۔
واضح رہے کہ تین دن قبل پنجاب کی جیلوں میں 10 ہزار بیمار قیدیوں نے طبی بنیاد پر لاہور ہائی کورٹ میں رہائی کی درخواست دائر کی تھی، درخواست میں استدعا کی گئی تھی کہ نواز شریف کی طرح بیمار قیدیوں کو طبی بنیاد پر ضمانت دی جائے۔
یہ بھی پڑھیں: جیلوں میں 10 ہزار بیمار قیدیوں کی طبی بنیاد پر رہائی کی درخواست
کیس کی سماعت لاہور ہائی کورٹ کے جسٹس رسال حسن سید نے کی، عدالت نے ضمانت پر رہائی کی درخواست چیف سیکریٹری پنجاب کو بھجواتے ہوئے فیصلے کی ہدایت کی۔
درخواست میں کہا گیا تھا کہ جیلوں میں 10 ہزارسے زائد قیدی مختلف بیماریوں میں مبتلا ہیں، جیلوں میں قیدیوں کو علاج کی مناسب سہولتیں میسر نہیں ہیں جس پر استدعا کی جاتی ہے کہ نواز شریف کی طرح بیمار قیدیوں کو طبی بنیاد پرضمانت دی جائے۔
