The news is by your side.

Advertisement

جدہ: ورکرز کے 100 سے زائد رہائشی مراکز خالی کروا لیے گئے

ریاض: سعودی عرب کے شہر جدہ میں ورکرز کی اجتماعی رہائش کے 100 سینٹر خالی کروا لیے گئے، جدہ میونسپلٹی کے انسپکٹرز نے ورکرز کی اجتماعی رہائش کے 600 سے زائد مراکز پر چھاپے مارے تھے۔

سعودی ویب سائٹ کے مطابق جدہ میونسپلٹی کے انسپکٹرز نے ورکرز کی اجتماعی رہائش کے 100 سینٹر خالی کروا لیے، مقررہ سینٹرز ضوابط کی خلاف ورزی کے مرتکب پائے گئے تھے۔

یاد رہے کہ میونسپلٹی حکام نے کرونا وائرس کی نئی لہر کے بعد ایک بار پھر ورکرز کے اجتماعی رہائشی مراکز کے تفتیشی دورے تیز کردیے ہیں۔

ایس پی اے کے مطابق جدہ میونسپلٹی کے انسپکٹرز نے ورکرز کی اجتماعی رہائش کے 600 سے زائد مراکز پر چھاپے مارے تھے، انہوں نے یہ یقین دہانی کرنے کے لیے چھاپہ مہم شروع کی ہے کہ آیا کرونا ایس او پیز کی پابندی کی جارہی ہے یا نہیں۔

اجتماعی رہائش کے مراکز میں سکونت پذیر ورکرز کے بارے میں یہ بھی دریافت کیا جارہا ہے کہ آیا انہوں نے مطلوبہ ٹیسٹ کروائے یا نہیں اور وہاں سینی ٹائزنگ کی کارروائی مطلوبہ شکل میں ہورہی ہے یا نہیں۔

جدہ میونسپلٹی نے توجہ دلائی ہے کہ بلدیاتی کونسل سسٹم کے تحت اجتماعی رہائش گاہوں کے لیے 333 پرمٹ جاری کیے جا چکے ہیں۔

جدہ میونسپلٹی نے اجتماعی رہائش گاہوں کے ضوابط کی خلاف ورزی کرنے والوں کو تاکید کی ہے کہ وہ پہلی فرصت میں جرمانے ادا کریں اور پرمٹ نہ رکھنے والے مراکز فوراً خالی کردیے جائیں۔

پرمٹ ہولڈرز کو تاکید کی گئی ہے کہ وہ اپنے یہاں موجود خلاف ورزیاں پہلی فرصت میں دور کریں، اگر ایسا نہ کیا تو ان کے خلاف جرمانے سمیت متعدد اقدامات کیے جائیں گے۔

جدہ میونسپلٹی نے مقامی شہریوں اور مقیم غیر ملکیوں سے درخواست کی ہے کہ اگر وہ اجتماعی رہائش کے مراکز پر کسی قسم کی کوئی خلاف ورزی دیکھیں تو پہلی فرصت میں 940 پر رابطہ کر کے مطلع کریں۔

Comments

یہ بھی پڑھیں