آمنہ الیاس کی کک سیب اور سر میں فرق نہ کر سکی، ایک شخص کے سر پر سیب رکھ کر کک سے نشانہ بنانے کی کوشش میں ان کی کک سیدھی کھوپڑی پر لگ گئی۔
ماڈل و اداکارہ آمنہ الیاس کو ایک شخص کے سر پر سیب رکھ کر اسے کک سے نشانہ بنانے پر تنقید کا سامنا کرنا پڑا ہے، آمنہ نے اس واقعے کی ویڈیو دو دن قبل اپنے انسٹاگرام اکاؤنٹ پر شیئر کی۔
اگرچہ آمنہ الیاس نے ویڈیو شیئر کرتے ہوئے یہ بھی لکھا کہ یہ ویڈیو بناتے ہوئے مذکورہ شخص کو چوٹ نہیں پہنچائی گئی، تاہم ویڈیو میں دیکھا جا سکتا ہے کہ آمنہ کی کک سیدھی اس شخص کی کن پٹی پر لگتی ہے، جس سے وہ ایک طرف گر جاتا ہے۔
انسٹاگرام پر اس ویڈیو کو لاکھوں مرتبہ دیکھا جا چکا ہے اور اس پر درجنوں افراد نے کمنٹس کیے ہیں، ویڈیو پر کمنٹس کرنے والے افراد میں شوبز شخصیات بھی شامل ہیں، جنھوں نے اداکارہ کے عمل کی حوصلہ شکنی کرنے کی بجائے ان کے عمل پر خوشی کا اظہار کیا۔
View this post on Instagram
تاہم بعض شخصیات نے ویڈیو کو خوف ناک بھی قرار دیا اور کہا کہ ویڈیو سے تشدد کی جھلک دکھائی دیتی ہے، بعض صارفین نے ان کی حوصلہ افزائی کرنے والی شوبز شخصیات پر بھی برہمی کا اظہار کیا، آمنہ الیاس کی اس ویڈیو پر مسکرانے والی شوبز شخصیات میں اداکارہ منال خان، ایمن خان اور سید صائم علی شامل تھے۔
لوگوں نے کہا جس مرد کے سر پر ’فروٹ‘ رکھ کر اداکارہ پاؤں سے نشانہ لگا رہی ہیں، اس شخص کی جگہ ان اداکارہ کو ہونا چاہیے تھا، ایک صارف نے اسے شرم ناک قرار دیا، اور اکثر نے لکھا کہ اب اس شخص کو بھی موقع دیا جانا چاہیے اسی طرح کک مارنے کا۔