اٹک : پاکستان تحریک انصاف ( پی ٹی آئی) کے لاپتہ وکیل انتظار حسین پنجوتھہ کو اٹک سے بحفاظت بازیاب کرا لیا گیا۔
اے آر وائی نیوز کے نمائندے لالہ صدیق کی رپورٹ کے مطابق اٹک میں جی ٹی روڈ پر پولیس اور اغواء کاروں کے درمیان مقابلہ ہوا جس کے بعد پی ٹی آئی وکیل انتظار پنجوتھہ کو بحفاظت بازیاب کرالیا گیا۔
اس حوالے سے پولیس حکام کا کہنا ہے کہ پولیس نے جی ٹی روڈ پر اسلام آباد سے کے پی جانے والی گاڑی کو رکنے کا اشارہ کیا، مشکوک گاڑی کے نہ رکنے پرپولیس کی جانب سے ناکہ بندی کی گئی۔
پولیس کے مطابق ناکہ بندی کے دوران گاڑی میں سوار اغواء کاروں نے پولیس پر اندھا دھند فائرنگ شروع کردی اغواء کار گاڑی اور مغوی چھوڑ کر فرار ہوگئے، بعد ازاں پولیس نے علاقے کی ناکہ بندی کرکے ملزمان کی تلاش شروع کردی۔
واضح رہے کہ بانی پی ٹی آئی کے وکیل انتظار حسین پنجوتھا 8 اکتوبر سے لاپتہ تھے، ان کی بازیابی کیلئے کیس بھی اسلام آباد ہائیکورٹ میں ایک مقدمہ بھی زیر سماعت ہے۔
یکم نومبر کو اٹارنی جنرل کی جانب سے اسلام آباد ہائیکورٹ کو یقین دہانی کرائی گئی تھی کہ انتظار پنجوتھا 24گھنٹے میں بازیاب ہوجائیں گے۔
اس سے پہلے اسلام آباد کے آئی جی پولیس کی طرف سے آئی ایچ سی میں جمع کرائی گئی رپورٹ میں بتایا گیا تھا کہ انتیظار پنجوتھا کے نام پر موبائل فون کی تین سمیں ہیں، جن میں سے ایک سم کی لوکیشن پشاور کی ہے۔
عدالت نے آئی جی پولیس سے استفسار کیا کہ کیا آپ نے پشاور کی لوکیشن تک رسائی حاصل کی ہے؟۔ آئی جی پولیس نے مزید کہا کہ یہ سم انتظار پنجوتھا کے نام پر جاری کی گئی تھی اور 10 دسمبر کو فعال کی گئی، اس سم پر آٹھ ایس ایم ایس آئے اور دو بھیجے گئے۔
