لاہور: صوبہ پنجاب میں ذخیرہ اندوروں کے خلاف کارروائیوں کا سلسلہ جاری ہے، حالیہ دنوں 610 مقامات پر ایکشن لیا گیا جہاں سے 44 ہزارٹن گندم برآمد ہوئی اور 498گاڑیاں بھی ضبط کی گئیں۔
تفصیلات کے مطابق پنجاب کے مختلف شہروں اور علاقوں میں حالیہ کارروائیوں کے دوران 610مقامات سے 44 ہزارٹن گندم برآمد ہوئی اور 498گاڑیاں بھی ضبط کرلی گئیں۔
کامیاب کارروائیوں کے بعد 213ایف آئی آر کا اندراج کیا گیا ہے۔
ادھر سینئروزیر عبدالعلیم خان کا کہنا ہے کہ ذخیرہ اندوزوں کا پیچھا جاری رکھیں گے، کسی سے رعائت نہیں ہوگی، ضلعی انتظامیہ اور حساس اداروں کے تعاون سے آپریشن جاری ہے۔
ذخیرہ اندوزی پر 3 سال قید، ضبط مال پر 50 فیصد جرمانہ ہوگا
ان کا مزید کہنا تھا کہ گندم کی مصنوعی قلت پیدا کرنے کی کوششیں ناکام بنارہے ہیں۔
خیال رہے کہ وزیراعظم کی ہدایت پر ذخیرہ اندوزی کے خلاف کارروائیاں تیز کردی گئی ہیں۔ گزشتہ ماہ معاون خصوصی فردوس عاشق اعوان کا کہنا تھا کہ آرڈیننس کے ذریعے ذخیرہ اندوزی سے نفع کمانے والوں کو سزا دی جائے گی، ذخیرہ اندوزی پر 3 سال قید ار ضبط شدہ مال کی مالیت کا 50 فی صد جرمانہ ادا کرنا ہوگا۔
