کراچی: انٹر کامرس کے نتائج میں تاخیر سے پریشان طلبہ کے لیے کراچی اور اردو یونیورسٹی کی جانب سے خوش خبری ہے کہ انھیں داخلہ ٹیسٹ میں بیٹھنے دیا جائے گا۔
تفصیلات کے مطابق انٹر کامرس ریگولر کے نتائج میں تاخیر سے جامعات میں داخلے کے خواہش مند طلبہ پریشانی میں مبتلا ہیں، انٹر بورڈ ساڑھے 3 ماہ گزر جانے کے باوجود نتائج کا اعلان نہیں کر سکا ہے، جس کی وجہ سے طلبہ کو مشکلات درپیش ہیں۔
واضح رہے کہ انٹر سال اوّل اور دوئم کامرس ریگولر امتحانات میں 50 ہزار سے زائد طلبہ شریک ہوئے تھے۔
دوسری طرف جامعہ کراچی اور اردو یونیورسٹی میں بی ایس پروگرامز میں ٹیسٹ کی بنیاد پر داخلوں کا آغاز ہو گیا ہے، تاہم جامعہ کراچی نے کامرس سال اوّل کی مارکس شیٹ کی بنیاد پر ٹیسٹ میں شرکت کی اجازت دے دی ہے۔
جامعہ کراچی کے مطابق ایڈمیشن کے خواہش مند طلبہ کا داخلہ انٹر سال دوئم کی مارکس شیٹ سے مشروط ہوگا۔
