کراچی : آئندہ سال سندھ میں ہونے والے میٹرک اور انٹرمیڈیٹ کے امتحانات کے حوالے سے اہم خبر آگئی، 2025 کے امتحان میں ہم ای مارکنگ کی جانب جائیں گے۔
تفصیلات کے مطابق وزیر برائے یونیورسٹیز اینڈ بورڈز محمد علی ملکانی نے انٹر بورڈ کراچی میں اسٹوڈینٹ فیسیلیٹیشن سینٹر کے افتتاح کے موقع پر گفتگو میں کہا کہ ہم نے سندھ کے وزیر تعلیم کو ان بورڈ لے لیا ہے، آئندہ برس سے پورے سندھ میں میٹرک اور انٹرمیڈیٹ کے امتحانات مارچ سے بتدریج شروع ہو جائیں گے، ہم پورے ملک کے ساتھ بیک وقت امتحانات لیں گے۔
وزیر یونیورسٹیز اینڈ بورڈ سے جب پوچھا گیا کہ سندھ میں بدترین گرمی میں امتحانات کیوں کروائے جاتے ہیں جس پر ان کا کہنا تھا کہ وہ اس معاملے پر وزیر تعلیم سے بات کر کے ہیں آئندہ ایسا نہیں ہوگا۔
سندھ کی جامعات میں وائس چانسلر کی تقرری میں تاخیر پر کیے گئے سوال پر وزیر یونیورسٹیز اینڈ بورڈ نے بتایا کہ کراچی کی لاء یونیورسٹی میں وائس چانسلر کی تقرری کا طریقہ کار اب تبدیل کررہے ہیں اور سفارش کی گئی ہے کہ وائس چانسلر کے لیے عمر کی حد 62 سے بڑھاکر 65 برس کردی جائے کیونکہ 62 برس کی حد کے تحت جنھوں نے انٹرویو دیے ان میں سے کوئی انٹرویو پاس نہیں کرسکا جس کے بعد یہ اصولی فیصلہ ہوا ہے۔
علاؤہ ازیں وزیر یونیورسٹیز اینڈ بورڈ محمد علی ملکانی کا کہنا تھا کہ ہم پورے سندھ میں ٹیکنالوجی بیس اسسمنٹ پر جائیں گے اور اسسمنٹ میں انسانی ہاتھ کا دخل کم سے کم کررہے ہیں۔
وزیر یونیورسٹیز اینڈ بورڈ کا مزید کہنا تھا کہ 2025 کے امتحان میں ہم ای مارکنگ کی جانب جائیں گے۔
اس موقع پر چیئرمین انٹرمیڈیٹ بورڈ زوالفقار شاہ اور ایک مارکنگ کے پروجیکٹ ڈائریکٹر رضوان سومرو نے ای مارکنگ پروجیکٹ کے حوالے سے وزیر یونیورسٹیز اینڈ بورڈ کو تفصیلی بریفننگ دی اور بتایا کہ 2025 کے امتحانات میں اس پروجیکٹ کے تحت امتحانی کاپیوں کی اسسمنٹ کس طرح ہوگی۔
بورڈز میں چیئرمین ، سیکریٹری اور ناظم امتحانات کی اسامیوں پر مستقل تقرریاں نہ ہونے پر کیے گیے سوال پر ان کا کہنا تھا کہ لاء افسر سے کہا ہے ہائی کورٹ سے اس معاملے پر حکم امتناع ختم کرانے کی کوشش کریں تاکہ مستقل افسران کی تعیناتی ہوسکے ۔
