اسلام آباد: وزارت داخلہ نے لاک ڈاؤن کے باعث پاکستان میں موجود تمام غیرملکیوں کے ویزوں میں توسیع کا اعلان کردیا۔
تفصیلات کے مطابق وزارت داخلہ کی جانب سے لاک ڈاؤن کے باعث پاکستان میں موجود تمام غیرملکیوں کے ویزوں میں 30 اپریل تک توسیع کا اعلان کردیا جس کا نوٹیفکیشن بھی جاری کردیا گیا ہے۔
وزارت داخلہ کے مطابق جن افراد کے ویزوں کی میعاد 15 مارچ سے ختم ہوگئی یا جن افراد کے ویزوں کی میعاد 30 اپریل کو ختم ہونی ہیں ایسے تمام افراد کے ویزے نافذ العمل تصور کیے جائیں گے۔
وزارت داخلہ حکام کے مطابق فیصلہ لوگوں کے وسیع تر مفاد کو مدنظر رکھ کر کیا گیا، احکامات اور تفصیلات نادرا کی ویب سائٹ پر بھی میسر کی جائیں گی۔
وزارت داخلہ نے امید ظاہر کی ہے کہ تمام متعلقہ افراد کو کسی قسم کی مشکل کا سامنا نہیں کرنا پڑے گا۔
واضح رہے کہ کرونا وائرس کی وجہ سے دنیا بھر میں فلائٹ آپریشن معطل ہونے کے باعث کئی غیرملکی پاکستان میں پھنسے ہوئے ہیں اور ان کے ویزوں کی میعاد ختم ہورہی ہے۔
پاکستان انٹرنیشنل ایئرلائن (پی آئی اے) کی جانب سے ملک میں موجود غیرملکیوں کو لے جانے اور بیرون ملک پھنسے پاکستانیوں کو واپس لانے کے لیے خصوصی پروازیں چلائی جارہی ہیں۔
