کراچی : اے وی سی سی کے عملے نے کلفٹن کے علاقے میں کامیاب کارروائی کرتے ہوئے منشیات کی بین الاقوامی سطح پر اسمگلنگ میں ملوث ملزمان کو حراست میں لے لیا۔
تفصیلات کے مطابق اینٹی وائئلینٹ کرائم سیل (اے وی سی سی) کی ٹیم نے تھانہ کلفٹن کی حدود نیلم کالونی میں اسپیشل برانچ کے ہمراہ آپریشن کرتے ہوئے چار انٹرنیشنل ڈرگ مافیا کے کارندے گرفتار کرلیے۔
ایس ایس پی اے وی سی سی عبدالرحیم شیرازی کے مطابق گرفتار ملزمان میں ریاض، ضیغم، اعظم اور عمر شہزاد شامل ہیں، گرو کا ماسٹر مائنڈ شہزاد ملائیشیا میں ڈرگ کا دھندا کرتا ہے، ملزم کچھ عرصہ پہلے ملائیشیا میں گرفتار ہوا تھا۔
گروہ مسافروں کو فی کیپسول 15 گرام ہیروئن ڈال کر دیتا ہے، کیپسولز کو ملک سے باہر اسمگل کرنے کی کوشش کی جارہی تھی، تقریباً ایک کلو فائن گریڈ کی ہیروئن 78 کیپسولوں میں ڈالی گئی تھی۔
ایس ایس پی اے وی سی سی عبدالرحیم شیرازی نے کہا کہ ہیروئن کی مالیت پانچ ملین ڈالر کے قریب بنتی ہے کارروائی کے دوران جب کیپسول بنانے کے اوزار دستاویزات اور دیگر برآمد،مزید چھاپہ مار کارروائیاں جاری ہیں۔
