اسلام آباد: وفاقی دارالحکومت اسلام آباد کی انٹرنیشنل اسلامک یونیورسٹی میں کرونا وائرس کے کیسز رپورٹ ہونے کے بعد یونیورسٹی کو 2 روز کے لیے بند کردیا گیا۔
تفصیلات کے مطابق وفاقی دارالحکومت اسلام آباد کی انٹرنیشنل اسلامک یونیورسٹی کے مختلف شعبوں میں کرونا وائرس کے کیسز رپورٹ ہونے کے بعد یونیورسٹی کو 29 اکتوبر تک بند رکھنے کا فیصلہ کیا گیا ہے۔
ڈسٹرکٹ ہیلتھ افسر زعیم ضیا کا کہنا ہے کہ یونیورسٹی میں کوویڈ 19 کے 2 کیسز رپورٹ ہوئے۔
ذرائع کے مطابق یونیورسٹی کے متعلقہ ڈپارٹمنٹس کو، جہاں سے کوویڈ کے کیسز رپورٹ ہوئے سیل کیے جانے کا امکان ہے۔
خیال رہے کہ اسلام آباد کی قائد اعظم یونیورسٹی میں بھی کرونا وائرس کے کیسز رپورٹ ہوئے جس کے بعد گزشتہ روز اسے 6 نومبر تک سیل کرنے کا نوٹیفکیشن جاری کردیا گیا۔
نوٹیفکیشن کے مطابق جامعہ میں 5 کرونا کیسز مثبت آنے پر یونیورسٹی کو سیل کیا گیا ہے، 6 نومبر تک طلبا کی کلاسز آن لائن ہوں گی، ہاسٹلز میں موجود طلبا کو ہاسٹل خالی کرنے کی ہدایت بھی کردی گئی ہے۔
