کراچی کے مختلف علاقوں میں انٹرنیٹ سروس کے متاثر ہونے کی اطلاعات سامنے آئی ہیں، ٹیکسٹ میسج کے علاوہ کچھ بی ٹرانسفر نہیں ہورہا۔
شہر قائد میں موبائل فون انٹرنیٹ سروس کے استعمال میں شہریوں کو شدید مشکلات کا سامنا ہے، واٹس ایپ صارفین کو رابطوں میں شدید مشکلات ہیں، وائس میسج، فوٹو اور ویڈیو شیئرنگ کی سروس متاثر ہوگئی ہے جس کے باعث صارفین کو دشواری ہورہی ہے۔
موبائل فون پرانٹرنیٹ کی سروس انتہائی سست روی کا شکار ہے، موبائل فون انٹرنیٹ پر شہریوں کے لیے ویڈیو اور آڈیو پیغام کی رسائی بھی ممکن نہیں رہی۔
وی پی این کے بغیر واٹس ایپ استعمال کرنے والے صارفین کو پریشانی کا سامنا ہے، گزشتہ دن سے انٹرنیٹ کی رفتار میں کمی آئی ہے۔
خیال رہے کہ دو دنوں قبل بھی 24 نومبر کو کراچی کے مختلف علاقوں میں موبائل فون انٹرنیٹ سروس متاثر ہوگئی تھی جس کے باعث صارفین کو مشکلات رہی تھیں۔
سیکیورٹی خدشات کے تحت کراچی کے مختلف علاقوں میں گزشتہ رات سے انٹرنیٹ سروس متاثر ہوئی تھی اس کے علاوہ وزارت داخلہ نے بھی اس حوالے سے بیان جاری کیا تھا۔
ترجمان وزارت داخلہ نے اپنے اعلامیے میں کہا تھا کہ صرف سکیورٹی خدشات والے علاقوں میں ہی موبائل ڈیٹا اور وائی فائی سروس کی بندش کا تعین کیا جائے گا، ملک کے باقی حصوں میں انٹرنیٹ اور موبائل سروس چلتی رہے گی۔
خیال رہے کہ پاکستان تحریک انصاف کے احتجاج کے پیش نظر راولپنڈی اور اسلام آباد کو 33 مقامات جبکہ لاہور اور فیصل آباد سے وفاقی دارالحکومت کو آنے والے تمام راستے بند کر دیے گئے ہیں۔
