اسلام آباد: پاکستانی اتھارٹیز کی جانب سے ملک میں انٹرنیٹ کو ریگولیٹ کرنے کے لیے وی پی این کے خلاف کریک ڈاؤن کرنے کا سلسلہ جاری ہے۔
ملکی صورتحال کے پیش نظر پاکستانی حکام انٹرنیٹ بالخصوص سوشل میڈیا پلیٹ فارم کے استعمال کو کافی عرصے ریگولیٹ کرنے کے خواہاں ہیں، اب تک پی ٹی اے کی جانب سے دو درجن سے زیادہ ورچوئل پرائیویٹ نیٹ ورکس (وی پی این) تک رسائی کو روکا جاچکا ہے۔
اب ٹیلی کام اتھارٹی نے وی پی این رجسٹریشن فیس اور دیگر تفصیلات کے حوالے سےاپ ڈیٹ شیئر کی ہے تاکہ صارفین اس سے استفادہ حاصل کرسکیں۔
پی ٹی اے نے وی پی این کی رجسٹریشن اور آئی پی وائٹ لسٹنگ کے لیے آسان طریقہ کار بتایا ہے تاکہ فری لانسرز اور کال سینٹرز چلانے والوں اس سہولت سے فائدہ اٹھائیں۔
پاکستان میں وی پی این رجسٹریشن کے عمل کو چار مختلف کیٹیگریز میں درجہ بند کیا گیا ہے، جن میں کمپنیوں، فری لانسرز، کال سینٹرز اور ویڈیو کانفرنسنگ کی کیٹیگری شامل ہے۔
کمپنیاں یا کاروبار محفوظ انٹرنیٹ تک رسائی کے لیے اپنے وی پی این کنکشن رجسٹر کر سکتے ہیں، فری لانسرز اپنے آجر کے تصدیقی خط کے ساتھ رجسٹر ہوسکتے ہیں۔
اس کے علاوہ کال سینٹرز سیکیورٹی اور فعالیت کو بڑھانے کے لیے آئی پیز کو وائٹ لسٹ کر سکتے ہیں، ویڈیو کانفرنسنگ کے سلسلے میں بلارکاوٹ مواصلات کو یقینی بنانے کے لیے کمپنیاں آئی پیز کو وائٹ لسٹ کر سکتی ہیں۔
آن لائن رجسٹریشن کا عمل انجام دینے کے لیے صارفین پی ٹی اے کی پورٹل پر جائیں اور رجسٹریشن یا آئی پی وائٹ لسٹنگ کے لیے درخواست دیں۔
وی پی این رجسٹریشن فیس کے حوالے سے ٹیلی کام اتھارٹی نے واضح کیا کہ وی پی این کی کوئی رجسٹریشن فیس نہیں ہے تاہم 5+ IPs کو وائٹ لسٹ کرنے کے لیے فیس ادا کرنا ہوگی۔
