ڈائریکٹرمیڈیا پاکستان کرکٹ بورڈ نے کہا ہے کہ انضمام الحق کنٹریکٹ کے باعث میڈیا میں بیان بازی نہیں کرسکتے، انکوائری کمیٹی انضمام الحق کو بلائے گی۔
تفصیلات کے مطابق پی سی بی کی ڈائریکٹر میڈیا عالیہ رشید نے واضح کیا ہے کہ معاہدے کی وجہ سے سابق چیف سلیکٹر ذرائع ابلاغ پر بیان نہیں دے سکتے۔ انضمام الحق ہمارے لیے قابل عزت ہیں، ابھی تحقیقات ہو رہی ہیں، شواہد اکھٹے کر رہے ہیں۔
ڈائریکٹرمیڈیا پی سی بی کا کہنا تھا کہ شواہد آجائیں تو ان پر بات کے لیے انکوائری کمیٹی انضمام الحق کو بھی بلائے گی۔
خیال رہے کہ پاکستان کرکٹ ٹیم کی سلیکشن کے حوالے سے مفادات کے ٹکراؤ کا معاملہ سامنے آنے کے بعد سابق چیف سلیکٹر انضمام الحق نے فوری طور پر استعفیٰ دیدیا تھا، پی سی بی نے تحقیقات کمیٹی بھی تشکیل دی ہے۔
ورلڈکپ کے لیے پاکستان کرکٹ ٹیم منتخب کرنے والے سابق چیف سلیکٹر انضمام الحق کا کہنا تھا کہ میرا استعفیٰ اب تک منظورنہیں کیا گیا یہ بات میڈیا کے ذریعے معلوم ہوئی، بورڈ نے نہیں بتایا۔
اس سے قبل پی سی بی کی ڈائریکٹر میڈیا اینڈ کمیونی کیشن عالیہ رشید کا کہنا تھا کہ انضمام الحق سے بلا کر پوچھا جائے گا کہ انھوں نے ایجنٹ کے معاملے پر پی سی بی کو آگاہ کیوں نہیں کیا۔
انھوں نے کہا کہ کھلاڑی اور چیف سلیکٹر کا ایجنٹ ایک ہے تو یہ مفادات کا ٹکراؤ ہے، تحقیقات میں وقت لگ رہا ہے لیکن چاہتے ہیں کہ کسی کے ساتھ زیادتی نہ ہو۔
