پی ایس ایل میں پشاور زلمی کے ڈائریکٹر انضمام الحق نے کپتان بابر اعظم کو اسٹرائیک ریٹ بہتر کرنے کا مشورہ دے دیا۔
پشاور زلمی کے ڈائریکٹر انضمام الحق کا کہنا ہے کہ اگر بابر اعظم اسٹرائیک ریٹ بہتر کرے گا تو پاکستان ٹیم کو ہی فائدہ ہوگا، ٹی 20 تیز کرکٹ ہے آپ کو چانس لینا پڑتا ہے۔
انہوں نے کہا کہ بابر اعظم نے خود ہی ون ڈاؤن پوزیشن پر کھیلنے کا فیصلہ کیا ہے۔
انضمام الحق نے کہا کہ پی ایس ایل 10 کے شروع کے میچوں میں بہتر کھیلتے تو آج اس پوزیشن میں نہ ہوتے۔
ان کا کہنا تھا کہ بابر اعظم چاہتے تھے کہ مچل اوون اوپنر کھیلیں اور پاور ہٹنگ کریں، بابر نے ضرورت کے مطابق اپنی اننگز کھیلی۔
سابق کپتان نے کہا کہ معاذ صداقت کا ڈیبیو تھا اس نے پریشر میں عمدہ کھیل کا مظاہرہ کیا، وکٹ آسان نہیں تھی بولنگ بھی زبردست تھی، وہ اوپنر ہیں لیکن مڈل آرڈر میں جس طرح سے اس نے کھیلا وہ قابل دید تھا۔
واضح رہے کہ گزشتہ روز پاکستان سپر لیگ (پی ایس ایل) سیزن 10 کے 22ویں میچ میں پشاور زلمی نے اسلام آباد یونائیٹڈ کو 6 وکٹ سے شکست دی تھی، معاذ صداقت کو ڈیبیو پر نصف سنچری اسکور کرنے پر بہترین کھلاڑی قرار دیا گیا۔
