لاہور : پاکستان کرکٹ بورڈ (پی سی بی ) کے چیف سلیکٹر انضمام الحق نے کہا ہے کہ آسٹریلیا کے خلاف سیریز میں کھلاڑیوں نے بہتر پرفارمنس کا مظاہرہ کیا ہے، امید ہے کہ ٹیم کم بیک کرتے ہوئے ون ڈے سیریز میں کامیابی حاصل کرے گی۔ پی ایس ایل کا فائنل لاہور میں ہونے سے بہت فائدہ ہو گا۔
ان خیالات کا اظہار انضمام الحق نے مشتاق احمد کے ہمراہ لاہور پریس کلب میں میڈیا سے گفتگو کرتے ہوئے کیاْ، انہوں نے کہا کہ آسٹریلیا کے خلاف چوتھے ون ڈے میچ میں اظہر علی اگر فٹ ہو گئے تو وہ ہی کپتانی کریں گے۔
انضام الحق نے کہا کہ آسٹریلیا سیریز کے بعد کرکٹ ختم نہیں ہو جائے گی آگے اور بہت سی سیریز ہیں، نوجوان کھلاڑیوں کے ساتھ ساتھ ڈومیسٹک کرکٹ میں پرفارم کرنے والے کھلاڑیوں کو بھی موقع دیا جائے گا۔ انہوں نے کہا کہ ہمارے کھلاڑیوں کی فٹنس کا معیار بھی دیگر ٹیموں کے مقابلے میں ذرا کم ہے، ٹیم کو تھوڑا وقت دیں، سب چیزیں بہتر ہو جائیں گی
چیف سلیکٹر کا کہنا تھا کہ انٹرنیشنل پلیئرز پاکستان آنے کو تیار ہیں، پی ایس ایل کا فائنل لاہور میں ہونے سے بہت فائدہ ہو گا۔ ملک میں انٹرنیشنل کرکٹ کی واپسی ہوگی۔ ہم دنیا کو یہ ثابت کر سکیں گے کہ پاکستان محفوظ ملک ہے۔
اس موقع پر مشتاق احمد نے کہا کہ اگلے دو ون ڈے کے لئے پچز پاکستان کے لئے سازگار ہیں۔ امید ہے کہ ٹیم کامیابی حاصل کرے گی۔
0
20
