سابق پاکستانی کرکٹر انضمام الحق نے گرین شرٹس کے خلاف بیان دینے پر بھارتی لیجنڈ کرکٹر سنیل گواسکر کو شدید تنقید کا نشانہ بنایا ہے۔
سنیل گواسکر کے اس بیان پر انضمام نے سخت ردعمل کا اظہار کیا کہ جس میں سابق بھارتی بیٹر نے کہا تھا کہ پاکستان بھارت کی بی ٹیم کو بھی نہیں ہراسکتا، ایک انٹرویو میں گواسکر کا کہنا تھا کہ ہندوستان کی بی ٹیم بھی پاکستان کو سخت چیلنج دے گی، پاکستان کی موجودہ ٹیم کے لیے بھارتی بی ٹیم کو بھی ہرانا بہت مشکل ہوگا۔
انضمام نے کہا کہ بھارت نے میچ جیتا ان کی ٹیم اچھا کھیلی لیکن مسٹر گواسکر کو بھی اعدادوشمار پر نظر ڈالنی چاہیے، وہ ایک بار پاکستان کے خلاف کھیلنے سے بچنے کے لیے شارجہ سے فرار ہو گئے تھے۔
انضمام الحق نے آئی پی ایل کے بائیکاٹ کا کیوں کہا؟
سابق پاکستانی کرکٹر نے کہا کہ گواسکر ہم سے بڑے ہیں وہ ہمارے سینئر ہیں، ہم ان کی بہت عزت کرتے ہیں، لیکن آپ کو کسی ملک کے بارے میں ایسے بات نہیں کرنی چاہیے۔
انضمام الحق نے کہا کہ یقیناً آپ کو اپنی ٹیم کی جتنی چاہیں تعریف کرنے کا حق ہے، لیکن دوسری ٹیم پر اس طرح کا تبصرہ کرنا برا عمل ہے۔
پاکستان کے سابق کپتان نے کہا کہ گواسکر ایک عظیم اور قابل احترام کرکٹر تھے لیکن اس طرح کے تبصرے کر کے وہ صرف اپنی میراث کی توہین کر رہے ہیں، انھیں اپنی زبان پر قابو رکھنا چاہیے۔
