پشاور: قومی کرکٹ ٹیم کے چیف سلیکٹر انضمام الحق نے کہا ہے کہ ورلڈ کپ کی تیاری بالکل ٹھیک جارہی ہے، ہمیں اچھے فاسٹ بولرز ملے ہیں۔
تفصیلات کے مطابق قومی کرکٹ ٹیم کے چیف سلیکٹر انضمام الحق نے کہا ہے کہ ورلڈ کپ کے لیے تیاری ہورہی ہے، کھلاڑی تیار ہیں، اچھی ٹیم بنے گی اور گرین شرٹس فیورٹ ہوگی۔
انضمام الحق نے کہا کہ زیادہ میچز کھیلنے سے بلے بازوں کی کارکردگی میں بہتری آئی ہے، آسٹریلیا کے خلاف آخری دو ون ڈے میچز میں پاکستانی ٹیم نے فائٹ کی۔
آسٹریلیا سے شکست پر انضمام الحق کا کہنا تھا کہ ہمارے 7 سے 8 کھلاڑی آرام کررہے تھے اور آخری دو میچز میں 10 کھلاڑی باہر تھے پھر بھی کھلاڑیوں نے محنت کی۔
مزید پڑھیں: ورلڈ کپ میں کپتان کون ہوگا، مکی آرتھر نے بتادیا
چیف سلیکٹر نے کہا کہ خیبرپختونخوا کا باصلاحیت کھلاڑیوں کی فراہمی میں اہم کردار ہے، نوجوان کرکٹرز کو اچھی کوچنگ ملے تو ان کے کھیل میں بہتری آئے گی، باصلاحیت کھلاڑیوں کے سامنے آنے سے بچوں میں مزید شوق پیدا ہوگا۔
واضح رہے کہ قومی کرکٹ ٹیم کے ہیڈ کوچ مکی آرتھر کا کہنا تھا کہ ورلڈ کپ کے لیے ہمارے پاس ہر کھلاڑی کا انفرادی منصوبہ تیار ہے، انگلینڈ میں بھرپور تیاری کریں گے، تمام اہم کھلاڑیوں کو فٹنس کے معیار پر پورا اترنا ہوگا، فٹنس پر کوئی سمجھوتہ نہیں کیا جائے گا۔
یاد رہے کہ آسٹریلیا نے پاکستان کو پانچ ون ڈے میچز کی سیریز میں کلین سویپ کیا تھا۔
