امریکی ملٹی نیشنل ٹیکنالوجی کمپنی ایپل کی جانب سے آئی فون 15 سیریز کو منگل 12 ستمبر کو متعارف کرایا جائے گا۔
اس سال آئی فون 15 سیریز میں 4 نئے ماڈلز کو متعارف کرائے جانے کا امکان ہے، یہ سیریز آئی فون 15، آئی فون 15 پلس، آئی فون 15 پرو اور آئی فون 15 پرو میکس پر مشتمل ہوگی۔
ان چاروں نئے ماڈلز میں دیگر پرو ماڈلز فیچرز کے حوالے سے زیادہ بہتر فونز ہوں گے، اس کے علاوہ آئی فون 15 پرو ماڈلز میں 10 نئے فیچرز متعارف کرائے جانے کا بھی امکان ہے۔
1۔ رپورٹ کے مطابق اس سال کے پرو ماڈلز کے لیے Titanium فریم استعمال کیا گیا ہے جس کے باعث ان ماڈلز کا وزن گزشتہ سال کے پرو ماڈلز کے مقابلے میں کم ہوگا۔
کیا نئے آئی فون کی رونمائی نئے چارجر کے ساتھ ہوگی؟
2۔ اسی طرح آئی فون 15 پرو اور 15 پرو میکس میں نئی اے 17 بائیونک چپ موجود ہوگی جس کے باعث وہ زیادہ طاقتور اور تیزی سے چلے گا۔
3۔ ایپل کی جانب سے اس سال پرو ماڈلز کے لیے سائیلنٹ سوئچ کی جگہ ایکشن بٹن کا اضافہ کیا جائے گا جسے صارفین متعدد کاموں کے لیے استعمال کرسکیں گے۔
4۔ اس سال کے آئی فونز کی ایک خاص بات چارجنگ کے لیے یو ایس بی سی پورٹ کو متعارف کرانا ہوگا جس سے ڈیٹا ٹرانسفر اسپیڈ بھی بڑھ جائے گی۔
5۔ اس سال پرو ماڈلز کے لیے کم از کم 4 نئے رنگوں کا آپشن فراہم کیا جائے گا۔
6۔ آئی فون 15 پرو میکس کے فرنٹ ڈسپلے میں کناروں کی پٹی یا بیزل اس وقت دستیاب تمام اسمارٹ فونز کے مقابلے میں سب سے کم ہوں گے، آئی فون 15 پرو میکس میں بیزل کا حجم محض 0.06 انچ ہوگا۔
7۔ آئی فون 15 پرو ماڈلز کے لیے 8 جی بی ریم دی جائے گی یعنی گزشتہ سال کے ماڈلز سے 2 جی بی ریم زیادہ ہوگی۔
8۔ ان نئے آئی فونز کے لیے وائی فائی 6 ای سپورٹ دی گئی ہے جس سے وائرلیس انٹرنیٹ اسپیڈ تیز ہو جائے گی۔
9۔ آئی فون 15 پرو میکس کے کیمرا سیٹ اپ میں پیری اسکوپ ٹیلی فوٹو کیمرا بھی موجود ہوگا جس سے 5 سے 6 ایکس آپٹیکل زوم کرنا ممکن ہو جائے گا۔
10۔ مختلف لیکس کے مطابق آئی فون 15 پرو ماڈلز کو زیادہ آسانی سے ریپیئر کرنا ممکن ہوگا۔
خیال رہے کہ اس سال آئی فون 15 پرو ماڈلز کی قیمت میں اضافے کا امکان ہے تاہم ابھی یہ واضح نہیں کہ قیمت میں کتنا اضافہ کیا جا سکتا ہے، مگر مختلف لیکس کے مطابق آئی فون 15 پرو اور 15 پرو میکس کی قیمت میں کم از کم 100 سے 200 ڈالرز کا اضافہ ہو سکتا ہے۔
