اگر آپ کا اسمارٹ فون ہاتھ سے چھوٹ کر کسی فرش پر گر جائے تو دل دھڑک سا جاتا ہے اور آپ فون اٹھا کر فوراً چیک کرتے ہیں کہ کہیں فون میں کوئی خرابی تو نہیں ہوگئی اور فون صحیح سلامت دیکھ کر سکھ کا سانس لیتے ہیں۔
لیکن اگر آپ کا فون اگر کسی دریا میں گر جائے تو فون کے صحیح سلامت ملنے کی بالکل بھی امید نہیں ہوتی، یقیناً آپ اس کی جگہ دوسرا اسمارٹ فون خرید لیتے ہیں۔
تاہم برطانیہ کے وائے دریا میں 10 ماہ قبل پارٹی کے دوران ایک شہری کا آئی فون پانی میں گر گیا تھا جو اسے واپس مل گیا ہے۔
حیرت انگیز بات یہ ہے کہ 10 مہینے پانی میں رہنے کے باوجود بھی فون کام کر رہا تھا۔
ایک شہری میگوئیل کو یہ فون وائے دریا سے اس وقت ملا جب وہ اپنی فیملی کے ہمراہ کشتی میں سفر کر رہا تھا، میگوئیل نے فون کو پانی سے نکالا اور گھر لا کر ایئر کمپریسر سے سُکھایا۔
فون خشک ہونے کے بعد شہری نے چارجنگ پر لگایا تو حیران کن طور پر موبائل چارج ہونے لگا۔
میگوئیل نے فون کی تصاویر ایک فیس بک گروپ پر شیئر کیں اور لاک اسکرین کی تصویر بھی پوسٹ کی جس میں ایک شخص اور خاتون کھڑے تھے۔
یہ پوسٹ ہزاروں مرتبہ شیئر کی گئی یہاں تک کہ تصویر میں موجود شخص کی شناخت اوین ڈیویز کے نام سے ہوگئی جو اسکاٹ لینڈ کا رہائشی تھا۔
ڈیویز نے بتایا کہ وہ دریا میں کشتی چلا رہا تھا کہ اس دوران فون پانی میں گر گیا تھا۔
