کراچی: معروف اداکارہ اقرا عزیز اور اداکار یاسر حسین رشتہ ازدواج میں بندھ گئے، دونوں کی شادی کی تصاویر سوشل میڈیا پر وائرل ہوگئیں۔
اقرا اور یاسر کی شادی کا چرچا کافی روز سے جاری تھا اور آج دوپہر دونوں بالآخر شادی کے بندھن میں بندھ گئے۔ تقریب میں دونوں کے دوستوں، رشتہ داروں جبکہ انڈسٹری سے تعلق رکھنے والی شخصیات نے بھی شرکت کی۔
اقرا نے اپنی زندگی کے سب سے اہم دن پر معروف ڈیزائنر نومی انصاری کا ڈیزائن کردہ سرخ رنگ لہنگا زیب تن کیا۔ یاسر حسین نے سنہرے رنگ کی شیروانی پہنی۔
دونوں کی شادی کی تصاویر تیزی سے سوشل میڈیا پر وائرل ہوگئیں اور دونوں کو خوب سراہا جارہا ہے۔
خیال رہے کہ اقرا عزیز نے چند ہی ڈراموں سے بہت جلد اداکاری میں اپنا لوہا منوا لیا ہے جبکہ ان کے مداحوں کی تعداد بھی دن بدن بڑھتی جارہی ہے۔
یاسر حسین نے رواں برس ایک ایوارڈ کی تقریب میں اقرا کو شادی کی پیشکش کی تھی جسے کچھ لوگوں نے پسند کیا جبکہ کچھ نے اسے پبلسٹی اسٹنٹ قرار دیتے ہوئے اس پر خاصی تنقید کی۔