تہران: حماس کے سابق سربراہ اسماعیل ہنیہ کی شہادت کے بعد مشرقِ وسطی میں کشیدگی بڑھتی جا رہی ہے اور خطے پر جنگ کے سائے منڈلانے لگے ہیں، ایسے میں ایران نے بحری بیڑے میں ہزاروں جدید کروز میزائل نصب کر دیے۔

غیر ملکی میڈیا رپورٹس کے مطابق ایرانی پاسدارانِ انقلاب نے اپنی بحری قوت میں اچانک مزید اضافہ کر دیا ہے، اور بحری بیڑے میں جدید کروز میزائل نصب کر دیے، میزائل سسٹم بحریہ کو سونپنے کے حوالے سے جمعہ کو ایک خصوصی تقریب کا انعقاد کیا گیا۔

پاسدارانِ انقلاب نے بحریہ کو ڈھائی ہزار سے زائد میزائل سسٹم اور ڈرونز سے لیس کیا ہے، یہ میزائل زیادہ دھماکا خیز مواد لے جانے کی صلاحیت رکھتے ہیں اور ان کا پتا بھی نہیں لگایا جا سکتا۔

ایرانی میڈیا کے مطابق یہ میزائل دشمن کو انتہائی قریب اور دور دونوں فاصلوں سے نشانہ بنا سکتا ہے، لانگ اور شارٹ میزائل، جاسوسی ڈرون اور ریڈار بھی بحری بیڑے میں شامل کیے گئے ہیں۔ بحریہ نے ایک بیان میں کہا کہ یہ میزائل سسٹم جدید ترین اینٹی سرفیس اور سب سرفیس ہتھیاروں پر مشتمل ہے۔

ڈونلڈ ٹرمپ کا طیارہ حادثے سے بال بال بچ گیا، ایمرجنسی لینڈنگ

پاسداران انقلاب کے اعلیٰ کمانڈر میجر جنرل حسین سلامی نے کہا کہ ’’آج کی دنیا میں آپ کو زندہ رہنے کے لیے یا تو طاقت ور ہونا پڑے گا، یا ہتھیار ڈالنے ہوں گے، کوئی درمیانی راستہ نہیں ہے۔‘‘ یاد رہے کہ ایرانی سپرم لیڈر آیت اللہ خامنہ ای نے حماس سربراہ کی شہادت کا بدلہ لینے کا حکم دیا ہے۔

دوسری جانب اسرائیلی وزیر اعظم بنجمن نیتن یاہو کے دفتر نے جمعرات کو کہا ہے کہ اسرائیل نے امریکی، قطری اور مصری ثالثوں کے مطالبے پر 15 اگست کو غزہ میں جنگ بندی مذاکرات دوبارہ شروع کرنے پر رضامندی ظاہر کی ہے۔ خیال رہے کہ امریکی، قطری اور مصری ثالث 10 ماہ سے جاری جنگ میں دوسری جنگ بندی کو یقینی بنانے کی کوشش کر رہے ہیں۔