ایرانی فورسز نے ملک کے شمالی مغربی حصے میں اسرائیل کی جانب سے جاسوسی کے مشن پر بھیجے گئے متعدد جاسوس ڈرونز کو کامیابی سے مار گرا دیا۔

قطری نشریاتی ادارے الجزیرہ کی رپورٹ کے مطابق ایران کے سرکاری ٹیلی ویژن نے بتایا کہ فورسز نے سلماس کے سرحدی علاقے میں کامیابی سے اسرائیلی جاسوس ڈرونز کو مار گرایا جنہوں نے ملک کی فضائی حدود کی خلاف ورزی کی۔

سرکاری ٹیلی ویژن نے مزید بتایا کہ ڈرونز جاسوسی کے مشن پر ایرانی فضائی حدود میں داخل ہوئے تھے۔

یہ بھی پڑھیں: ایران کے جوابی حملے میں اسرائیل کا جدید دفاعی نظام ناکام ہوگیا، حماس

واضح رہے کہ ایران نے ہفتے کی علی الصبح تک اسرائیل پر جوابی میزائل حملے کیے جن میں کم از کم دو افراد ہلاک اور درجنوں زخمی ہوگئے۔

واضح رہے کہ ایران کے اسرائیلی جارحیت کے خلاف جوابی حملے جاری ہیں۔ رات سے اب تک ایران اسرائیل پر پانچ میزائل حملے کر چکا ہے جبکہ آج صبح تل ابیب اور مقبوضہ بیت المقدس میں پھر دھماکے سنے گئے۔

اسرائیلی فوج نے شہریوں کو دوبارہ محفوظ مقامات پر جانے کی ہدایت کی ہے۔ گزشتہ رات ایران نے اسرائیل پر جوابی حملہ کرتے ہوئے 200 سے زیادہ میزائل فائر کئے تھے جن میں چار اسرائیلی شہری ہلاک اور ساٹھ سے زیادہ زخمی ہوئے تھے۔

پاسداران انقلاب نے اعلان کیا ہے کہ اسرائیل پر خیبر میزائل جلد داغے جائیں گے اور دنیا حیران رہ جائے گی۔ ایرانی فوج اسرائیل میں ان اہداف کو نشانہ بنا رہی ہے جہاں سے ایران پر جارحیت کی جا رہی ہے۔ میزائل حملوں میں 150 اسرائیلی اہداف کو نشانہ بنایا گیا۔