امریکی صدر ڈونلڈ ٹرمپ کی اعلان کردہ جنگ بندی کے نفاذ سے قبل ایران کے اسرائیل پر میزائل حملوں میں 3 اسرائیلی ہلاک اور 2 زخمی ہوگئے۔
رائٹرز کے مطابق جنوبی اسرائیل میں ایرانی میزائل حملے کے نتیجے میں 3 افراد ہلاک اور 2 زخمی ہوگئے، ایران کی جانب سے یہ حملہ جنگ بندی کے اعلان سے قبل کیا گیا ہے۔
دوسری جانب اسرائیلی میڈیا نے جنوبی اسرائیل میں میزائل گرنے کے مقام پر 3 افراد کی ہلاکت کی تصدیق کی ہے، جبکہ تقریباً 6 افراد کو معمولی زخموں کے باعث موقع پر ہی طبی امداد دی گئی ہے اس کے علاوہ 2 افراد کو اسپتال منتقل کیا گیا۔
اسرائیلی میڈیا کے مطابق جنوبی اسرائیل کے علاقے بیرشیبا میں ایران کے میزائل حملوں کے باعث ایک گھنٹے کے دوران 6 مرتبہ سائرن بجے، عمارت پر میزائل لگنے سے 3 افراد ہلاک اور کم ازکم 9 زخمی ہوئے۔
ایران اور اسرائیل میں جنگ بندی کا باقاعدہ آغاز، ٹرمپ کا نیا بیان جاری
واضح رہے کہ امریکی صدر ڈونلڈ ٹرمپ نے اپنے سوشل میڈیا اکاؤنٹ پر اعلان کیا تھا کہ اسرائیل اور ایران جنگ بندی پر متفق ہوگئے اور اگلے 6 گھنٹوں میں حملے بند کردیے جائیں گے۔
Footage circulating on social media shows the moment an Iranian ballistic missile impacted in southern Israel, causing the deaths of three and wounding at least eight more. pic.twitter.com/y99cMvWf6D
— The Jerusalem Post (@Jerusalem_Post) June 24, 2025
بعد ازاں، غیر ملکی خبررساں ایجنسی ’رائٹرز‘ نے رپورٹ کیا کہ قطر کے وزیرِ اعظم شیخ محمد بن عبد الرحمٰن آل ثانی نے ایرانی قیادت کے ساتھ بات چیت کے بعد تہران کی جانب سے امریکا کی جنگ بندی کی تجویز پر رضامندی حاصل کر لی۔
اس رابطے سے قبل، امریکی صدر ڈونلڈ ٹرمپ نے قطر کے امیر کو ٹیلی فون کیا اور انہیں بتایاکہ اسرائیل جنگ بندی پر راضی ہو چکا ہے اور انہوں نے تہران کو قائل کرنے کے لیے دوحہ سے مدد طلب کی تھی۔
