ایران کی جوہری تنصیبات پر دنیا بھر کے ممالک کی جانب سے ردعمل ظاہر کیا جا رہا ہے امریکی حریف سمجھے جانے والے ملک چین نے بھی ردعمل جاری کر دیا ہے۔
چین نے ایران کی جوہری تنصیبات پر امریکی حملے کی شدید مذمت کرتے ہوئے کہا ہے کہ امریکی حملہ اقوام متحدہ کے چارٹر اور عالمی قوانین کی خلاف ورزی ہے۔
چین نے امریکی حملے سے کشیدگی میں اضافے کے خدشات کا اظہار کرتے ہوئے کہا ہے کہ امریکی حملے سے مشرق وسطیٰ کے حالات مزید خراب ہوں گے۔
وزارت خارجہ کی جانب سے جاری بیان میں کہا گیا ہے کہ تمام فریقین کو مذاکرات کی طرف لوٹنا چاہیے۔ تنازع کے پر امن حل کے لیے چین مل کر کام کرنے کو تیار ہے۔
واضح رہے کہ امریکا نے گزشتہ شب ایرانی کی 3 جوہری تنصیبات پر حملہ کیا تھا۔ اس حملے کے بعد امریکی صدر ڈونلڈ ٹرمپ نے ایران کی جوہری تنصیبات تباہ کرنے کا دعویٰ کرتے ہوئے کہا تھا کہ دنیا کے لیے ایران کا جوہری خطرہ ختم کر دیا۔ اسرائیل اب زیادہ محفوظ ہے۔
دوسری جانب امریکی حملے کے بعد ایران کی جانب سے سخت ردعمل کا اظہار کیا گیا ہے اور ایرانی وزیر خارجہ عباس عراقچی نے پریس کانفرنس کرتے ہوئے کہا کہ ٹرمپ نے ہم سے دھوکا کیا اور شب امریکا نے ایران کی جوہری تنصیبات پر حملہ کر کے ریڈ لائن کراس کی۔
ایران، اسرائیل اور امریکی تنازع سے متعلق تمام خبریں جاننے کے لیے کلک کریں
انہوں نے متنبہ کیا کہ امریکی حملے کے بعد ایران کو اپنے دفاع کا حق حاصل ہے اور ہم اپنے عوام کے دفاع پر کوئی سمجھوتہ نہیں کریں گے۔ امریکی حملے کے سنگین نتائج برآمد ہوں گے۔
دریں اثنا امریکا کے ایران کی جوہری تنصیبات پر حملوں کی پاکستان سمیت روس، سعودی عرب، عمان، ترکیہ اور دنیا کے بیشتر ممالک نے مذمت کرتے ہوئے اس کو دنیا کے امن کے لیے خطرہ قرار دیا ہے۔
