ایران اور اسرائیل کے درمیان بڑھتی ہوئی کشیدگی 7 ویں روز میں داخل ہوچکی ہے، اسرائیلی فورسز نے تازہ کارروائی کے دوران ایرانی شہر کراج اور پیام ہوائی اڈے کے قریب حملے کئے۔
غیر ملکی میڈیا کے مطابق اسرائیلی فورسز کا کہنا ہے کہ تہران اورکاراج میں حملے کئے ہیں، جبکہ تہران اور ایران کے دیگر علاقوں میں نئے حملوں کا آغاز کیا گیا ہے۔
اسرائیلی فوج نے دعویٰ کیا ہے کہ تہران میں ایران کے داخلی سلامتی کے ہیڈ کوارٹر کو بھی نشانہ بنایا ہے، ایرانی شہرکراج اور پیام ہوائی اڈے کے قریب حملے کئے۔
ایرانی میڈیا کا کہنا ہے کہ ایران نے تہران میں متعدد اسرائیلی ڈرونز کو تباہ کردیا ہے۔
ایران میں اسرائیلی حملوں سے کتنے افراد شہید ہوچکے؟
اسرائیلی حملوں کے باعث ایران میں کم از کم 639 افراد جاں بحق اور 1,320 سے زائد زخمی ہو چکے ہیں۔
رپورٹ کے مطابق یہ انکشاف امریکا میں قائم انسانی حقوق کی تنظیم ہیومن رائٹس ایکٹوسٹس کی جانب سے سامنے آیا ہے۔
تنظیم کا کہنا ہے کہ ایران میں اسرائیلی حملوں سے شہید ہونے والے افراد میں 263 عام شہری اور 154 سیکیورٹی اہلکار شامل ہیں جبکہ دیگر کی شناخت جاری ہے۔
رپورٹ کے مطابق یہ اعداد و شمار ایران کے اندر موجود مقامی ذرائع اور تنظیم کے اندرونی نیٹ ورک سے تصدیق کے بعد مرتب کیے گئے ہیں۔
ایران نے جانی نقصان کی باقاعدہ تفصیلات جاری نہیں کی ہیں، تاہم، ایرانی حکام کی جانب سے آخری بار جاری کردہ اعداد و شمار کے مطابق 224 افراد کے جاں بحق اور 1,277 افراد کے زخمی ہونے کی تصدیق کی گئی تھی۔
ایران اسرائیل جنگ سے متعلق تازہ ترین خبریں یہاں پڑھیں
ہیومن رائٹس ایکٹوسٹس کے مطابق زمینی حقائق کے پیش نظر اصل تعداد اس سے بھی زیادہ ہو سکتی ہے اور کئی علاقوں میں شدید بمباری کی وجہ سے نقصانات کی مکمل معلومات تک رسائی ممکن نہیں۔
