تہران: اسرائیل نے ایران کے مختلف شہروں پر کروز میزائلوں سے حملے کیے ہیں، اسرائیل نے کہا ہے کہ ہفتے کے دن ایران پر حملوں کا ہدف پورا کر لیا.
تفصیلات کے مطابق ایران کے اندر ہفتے کے روز اسرائیلی حملوں میں فوجی ہیڈکوارٹر سمیت بندر عباس، تبریز، اصفہان، ہرمزگان، کرمانشاہ اور مشرقی آذربائیجان نشانہ بنے۔
اسرائیل نے ایران کے شہر شہران میں تیل کے ڈپو، بوشہر کے قریب گیس فیلڈ اور آبادان ریفائنری پر میزائیلوں سے حملے کیے، جن سے آگ بھڑک اٹھی۔ اسرائیل کا کہنا تھا کہ اس نے ہفتہ کے دن ایران پر حملوں کا ہدف پورا کر لیا، آئی ڈی ایف نے ایک بیان میں کہا تہران میں وسیع پیمانے پر حملے مکمل ہو گئے، ایرانی جوہری ہتھیاروں کی تنصیب اور ایندھن ذخائر کو نشانہ بنایا۔۔
غیر ملکی میڈیا رپورٹس کے مطابق مشرقی آذربائیجان میں اسرائیل کے حملوں میں 30 افراد جاں بحق اور 55 سے زائد زخمی ہو گئے ہیں، دیگر حملوں میں 80 افراد جاں بحق ہوئے۔
اسرائیل کے 10 لڑاکا طیارے گرا دیے، ایرانی فوج کا دعویٰ
دوسری طرف ایران نے اسرائیلی حملے کے جواب میں رات گئے 2 بڑے فضائی حملے کیے، پہلے حملے میں 100 اور دوسرے حملے میں 50 میزائل داغے گئے، ایرانی حکام کے مطابق حملوں میں اب تک 8 اسرائیلی ہلاک اور 500 سے زائد زخمی ہوئے ہیں، اسرائیلی حکام نے 8 افراد کی ہلاکت اور 200 کے زخمی ہونے کی تصدیق کی ہے، جب کہ 35 سے زائد اسرائیلی لاپتا ہیں۔
ایران اسرائیل جنگ سے متعلق تازہ ترین خبریں یہاں پڑھیں
پاسداران انقلاب کے مطابق 50 سے زائد خیبر، بدر اور عماد میزائل اسرائیل پر داغے گئے، ایران نے میزائل حملوں میں حیفہ، تل ابیب اور مقبوضہ بیت المقدس میں قائم اسرائیلی فوجی تنصیبات کو نشانہ بنایا، میزائل گرنے سے تل ابیب اور مقبوضہ بیت المقدس میں دھماکے اور سائرن کی آوازیں سنی گئیں، اسرائیل نے تسلیم کیا ہے کہ ایرانی حملوں کے نتیجے میں عمارتوں کو نقصان پہنچا۔
ادھر ایرانی فوج نے جنگ کے دوران اب تک 3 ایف 35 سمیت 10 اسرائیلی طیارے مار گرانے کا دعویٰ کیا ہے۔ عرب میڈیا کی رپورٹ کے مطابق ایرانی ایئر ڈیفنس بیس کے کمانڈر نے ایک گھنٹے میں ملک کے مختلف علاقوں میں دشمن کے دس اسرائیلی فوجی طیارے مار گرانے کا اعلان کیا، ایرانی حکام نے ان کارروائیوں کو اپنی دفاعی صلاحیت کا مظاہرہ قرار دیا۔
