جمعیت علمائے اسلام کے مرکزی رہنما اور سابق سینیٹر حافظ حمد اللہ نے کہا ہے کہ اسرائیل کے خلاف جنگ میں ہم ایران کے ساتھ ہیں۔
جے یو آئی کے مرکزی رہنما اور سابق سینیٹر حافظ حمد اللہ نے چمن میں اے آر وائی نیوز سے بات چیت کرتے ہوئے واضح طور پر کہا ہے کہ اسرائیل امریکا کا بغل بچہ ہے اور ایران اسرائیل جنگ میں ہم ایران کے ساتھ ہیں۔
حافظ حمد اللہ نے مزید کہا کہ اسرائیل جہاں دوڑتا ہے، پاگل کتے کی طرح کاٹنے کے سوا کچھ نہیں کرتا۔ امریکی صدر ٹرمپ کی سپورٹ سے اسرائیل کی بربریت جاری ہے۔ وہ فلسطین میں ڈیڑھ سال سے ظلم اور بربریت کر رہا ہے۔ فلسطین میں 60 ہزار مسلمانوں کو شہید کیا جا چکا ہے۔ ان مظالم میں اقوام متحدہ کہاں ہے؟
جے یو آئی رہنما نے کہا کہ اسرائیل اور امریکا ایران پر ایٹمی ہتھیاروں کا الزام لگا رہے ہیں جب کہ بین الاقوامی ادارہ آئی اے ای اے واضح کہہ چکا ہے کہ ایران کے پاس ایٹمی ہتھیار نہیں۔ ایران کے سپریم لیڈر آیت اللہ خامنہ ای نے بھی کہا ہے کہ ان کے پاس کیمیائی ہتھیار نہیں ہیں۔
انہوں نے یہ بھی کہا کہ او آئی سی نے آج تک مظلوم مسلمانوں کے لیے آواز نہیں اٹھائی۔ اسرائیل کے خلاف جنگ میں اگر ایران کو شکست ہوئی تو یہ پاکستان کے لیے مشکلات کا آغاز ہوگا۔
ایران اسرائیل کشیدگی سے متعلق تمام خبریں
واضح رہے کہ گزشتہ ہفتہ اسرائیل کے ایران پر حملوں میں پہل کرنے پر قومی اسمبلی اور سینیٹ میں اسرائیلی جارحیت کے خلاف مذمتی قرارداد منظور کی گئی تھی۔
اسرائیل کا ایران پر حملہ، پاکستان کا ردعمل
اس کے علاوہ دفتر خارجہ کی جانب سے جاری بیان میں بھی اسرائیلی حملوں کو ایران کی خودمختاری اور علاقائی سالمیت کے لیے خطرہ قرار دیتے ہوئے ایران کے عوام سے بھرپور اظہار یکجہتی کیا گیا تھا۔
