تہران: ایران نے اسرائیل پر فتح 1 ہائپر سونک میزائل داغ دیا ہے، اور دعویٰ کیا ہے کہ اس نے اسرائیل کی فضائی حدود پر کنٹرول حاصل کر لیا ہے۔
بھارتی میڈیا نے رپورٹ کیا ہے کہ ایران نے اسرائیلی اہداف پر جدید فتح-1 ہائپر سونک میزائل فائر کیے ہیں اور علاقائی فضائی حدود پر کنٹرول کا اعلان کیا ہے۔
ایران اسرائیل جنگ میں شدت آ گئی ہے، پاسداران انقلاب کا کہنا ہے کہ آپریشن وعدہ صادق سوم کی یہ دسویں لہر ہے، جس کے تحت وسطی اور شمالی اسرائیل پر 20 کے قریب میزائل داغے گئے، اور تل ابیب پر ہائپر سونک میزائل فائر کیے۔
میزائل حملوں سے اسرائیل میں کئی مقامات پر آگ لگ گئی ہے، پاسداران انقلاب کے مطابق فتح 1 نے اسرائیلی دفاعی نظام کو نشانہ بنایا، فتح ون میزائل اسرائیلی دفاعی نظام کے خاتمے کا آغاز ہے۔ یہ پیش رفت امریکی صدر ڈونلڈ ٹرمپ کے ایران سے ’غیر مشروط ہتھیار ڈالنے‘ کے مطالبے کے چند گھنٹے بعد سامنے آئی ہے۔
ایران اسرائیل جنگ سے متعلق تازہ ترین خبریں یہاں پڑھیں
دوسری طرف اسرائیل کی جانب سے بھی ایران پر حملے جاری ہیں، اسرائیلی فورسز نے دعویٰ کیا ہے کہ ایرانی سینٹری فیوج پروڈکشن سائٹ، اور میزائل فیکٹریوں کو نشانہ بنایا گیا ہے، اور گزشتہ رات ایران پر حملوں میں 50 سے زیادہ طیاروں نے حصہ لیا۔
ادھر یواے ای نے سلامتی کونسل سے اسرائیل ایران تنازع فوری حل کرانے پر زور دیتے ہوئے کہا ہے کہ تنازع فوری حل کرایا جائے، اس سے پہلے کہ حالات قابو سے باہر ہوں۔ آیت اللہ خامنہ ای نے ایک ٹویٹ میں یہ لکھ کر کہ ’’جنگ شروع ہو گئی ہے‘‘ اسرائیل کو خبردار کیا ہے کہ صہیونیوں سے کوئی سمجھوتا نہیں ہوگا، اور ان پر کوئی رحم نہیں کیا جائے گا۔
