تہران: ایران کے سپریم لیڈر آیت اللہ خامنہ ای نے عبرانی زبان میں ٹویٹ کر کے اسرائیلیوں پر واضح کیا ہے کہ صہیونیوں سے کوئی سمجھوتا نہیں ہوگا۔

غیر ملکی میڈیا رپورٹس کے مطابق آیت اللہ خامنہ ای نے X پر ایک تازہ پوسٹ میں واضح کیا ہے کہ ایران صہیونیوں کے ساتھ کسی قسم کا سمجھوتا نہیں کرے گا، اور ان سے سختی سے نمٹا جائے گا۔

ایرانی سپریم لیڈر نے ٹویٹ میں اسرائیلی جارحیت کے خلاف سخت جوابی کارروائی کے عزم کو دہرایا، انگریزی اور عبرانی زبان میں کیے گئے اپنے پیغام میں خامنہ ای نے لکھا کہ دہشت گرد صہیونی حکومت کو ایک طاقت ور جواب دینا ہوگا، اور صہیونیوں پر کوئی رحم نہیں کریں گے۔ فارسی میں ایک اور ٹویٹ میں انھوں نے لکھا کہ ’’جنگ شروع ہو گئی ہے۔‘‘

We must give a strong response to the terrorist Zionist regime.
We will show the Zionists no mercy.

— Khamenei.ir (@khamenei_ir) June 17, 2025

ایران اور اسرائیل کے درمیان حالیہ کشیدگی کے پس منظر میں سپریم لیڈر کا یہ بیان تہران کی جانب سے کسی بھی مزید حملے کی صورت میں سخت ردعمل کا عندیہ دیتا ہے۔

ایران اسرائیل جنگ سے متعلق تازہ ترین خبریں یہاں پڑھیں

واضح رہے کہ اسرائیلی وزیر دفاع کاٹز نے گزشتہ روز کہا تھا کہ خامنہ ای کا بھی صدام حسین جیسا انجام ہو سکتا ہے، وہ پڑوسی ملک کے ڈکٹیٹر کی قسمت کو یاد رکھیں۔ اسرائیلی وزیر دفاع نے تہران کے رہائشیوں کے لیے اسرائیلی دھمکیوں کو دہراتے ہوئے کہا تہران میں حکومت اور فوجی اہداف کے خلاف کارروائی جاری رکھیں گے۔ یاد رہے اسرائیلی وزیر اعظم نیتن یاہو نے بھی ایران کے سپریم لیڈر آیت اللہ خامنہ ای کو نشانہ بنانے کی دھمکی دی تھی۔