تہران: امریکی صدر ڈونلڈ ٹرمپ کی جانب سے نئی پاپندیوں کے بعد ایران نے بھی جوہری معاہدے سے انخلا کی دھمکی دے دی۔
تفصیلات کے مطابق امریکا گذشتہ سال مئی میں جوہری ڈیل سے دست بردار ہوچکا ہے، جس کے بعد اب ایران نے بھی معاہدے سے انخلا کی دھمکی دی ہے۔
غیر ملکی خبر رساں ادارے کا کہنا ہے کہ ایران کی جانب سے یہ عندیہ امریکی نئی پابندیوں کے ردعمل میں دیا گیا ہے، خیال رہے کہ امریکا نے ایران دوست ممالک کو ایرانی تیل کی خریداری کے لیے دیا گیا استثناء ختم کردیا ہے۔
امریکا نے استثنا کے خاتمے کے بعد ان تمام ممالک کو خبردار کیا ہے کہ وہ ایرانی تیل درآمد کرنے سے پرہیز کریں بصورت دیگر ان پر بھی پابندیاں عائد کی جاسکتی ہیں۔
ایرانی وزیرخارجہ جواد ظریف کا کہنا تھا کہ امریکی اقدامات کے ردِ عمل میں جوہری ہتھیاروں کے عدم پھیلاؤ کے معاہدے سے نکل جانا ایران کے پاس موجود کئی امکانات میں سے ایک ہے۔
ان کا مزید کہنا تھا کہ امریکی پابندیاں اور عالمی سطح پر یہی صورت حال رہی تو ایران یہ قدم بھی اٹھا سکتا ہے۔ واضح رہے ایرانی وزیرخارجہ جلد شمالی کوریا کا دورہ کریں گے۔
ایران آج بھی جوہری ڈیل کی تعمیل کررہا ہے: اقوامِ متحدہ
اس دورہ کا مقصد دونوں ممالک پر عائد امریکی پابندیوں پر تبادلہ خیال کرنا اور مستقبل کے لائحہ پر غور کرنا ہے، اس سے قبل شمالی کوریائی رہنما کم جونگ ان روس کا دورہ کرچکے ہیں، اس دوران بھی امریکا پابندیوں پر تبادلہ خیال ہوا تھا۔
