تہران: ایران کی سپاہ پاسداران انقلاب اسلامی (آئی آر جی سی) نے ملک کے وسطی صحرائی علاقے میں مشترکہ میزائل اور ڈرون مشقوں کا آغاز کردیا ہے۔
مقامی میڈیا رپورٹ کے مطابق پندرہویں پیامبر اعظم مشقوں کے پہلے مرحلے میں سپاہ پاسداران انقلاب اسلامی نے بڑے پیمانے پر زمین سے زمین پر مار کرنے والے بیلسٹک میزائل فائر کیے اور بم بردار ڈرونز کے ذریعے کارروائیاں کی گئیں۔
میڈیا رپورٹ کے مطابق فرضی دشمن کے اڈے پر مشترکہ حملہ کیا گیا اور مقرر کردہ تمام اہداف کو تباہ کر دیا گیا، میزائل کی نئی نسل علیحدہ ہونے والے وار ہیڈز سے لیس ہے اور کرہ ہوائی سے باہر رہنمائی کی صلاحیت رکھتا ہے۔
حکام کے مطابق یہ میزائل دشمن کی میزائل شیلڈ میں خلل پیدا کرنے اور اس میں سے گزرنے میں بھی کامیاب ہے۔
مذکورہ فوجی مشقوں کا انعقاد سپاہ پاسداران انقلاب اسلامی کے چیف کمانڈر میجر جنرل حسین سلامی، سپاہ پاسداران انقلاب اسلامی کی فضائیہ کے کمانڈر بریگیڈیئر جنرل امیر علی حاجی زادہ اور ایرانی مسلح افواج کے دیگر اعلیٰ کمانڈروں اور عہدے داروں کی موجودگی میں کیا گیا۔
