اسلام آباد: پاکستان نے افسوس ناک ہیلی کاپٹر حادثے میں ایرانی صدر اور وزیر خارجہ کی شہادت پر ایران کے لیے پیغام میں کہا ہے کہ وہ اس انتہائی مشکل گھڑی میں ایران کے عوام کے ساتھ ہے۔
ترجمان دفتر خارجہ ممتاز زہرہ بلوچ نے کہا کہ پاکستان ایرانی صدر ابراہیم رئیسی اور وزیر خارجہ کی ہیلی کاپٹر حادثے میں شہادت پر غم کی اس گھڑی میں اسلامی جمہوریہ ایران کے عوام کے ساتھ اظہار تعزیت کرتا ہے۔ ہماری دعائیں شہدا کے اہل خانہ اور اسلامی جمہوریہ ایران کے عوام کے ساتھ ہیں۔
دفتر خارجہ نے بیان میں کہا کہ صدر سید ابراہیم رئیسی اور وزیر خارجہ حسین امیر عبداللہیان قابل احترام رہنما تھے، ایرانی صدر کی پاک ایران تعلقات، علاقائی تعاون کو تقویت دینے کے لیے خدمات کو یاد رکھا جائے گا، ایرانی صدر نے دو طرفہ تعلقات کو مستحکم کرنے کے لیے اپریل میں پاکستان کا دورہ کیا، پاکستان ایران کے ساتھ دوستی اور تعاون آگے بڑھانے کے اپنے عزم کا اعادہ کرتا ہے، اور سوگ کی گھڑی میں ہم ایرانی بھائیوں کے ساتھ اظہار یکجہتی کرتے ہیں۔
واضح رہے کہ آذر بائیجان دورے سے واپس جاتے ہوئے ایرانی صدر ابراہیم رئیسی ہیلی کاپٹر حادثے میں جاں بحق ہو گئے ہیں، تہران ٹائمز کے مطابق ہیلی کاپٹر حادثے میں ایرانی وزیر خارجہ امیر عبداللہیان اور مشرقی آذربائیجان صوبے کے گورنر ملک رحمتی بھی جاں بحق ہوئے۔
ایرانی صدر کے ہیلی کاپٹر میں سوار تمام افراد جاں بحق، تہران ٹائمز
ایرانی سفارت خانہ اسلام آباد کی جانب سے بھی ایرانی صدر ابراہیم رئیسی کی شہادت کا اعلان جاری کر دیا گیا ہے، جس میں کہا گیا ہے کہ ایرانی صدر وفد کے ہمراہ پڑوسی ملک کے ساتھ ایک ترقیاتی منصوبے کا افتتاح کرنے کے مشن کے دوران ہیلی کاپٹر کے حادثے کے نتیجے میں شہید ہوئے۔
