تہران: ایرانی بحریہ نے مشقوں کے دوران اپنے ہی سپورٹ شپ پر میزائل داغ دیا جس کے نتیجے میں نیوی کے 19 اہلکار ہلاک جبکہ 15 زخمی ہوگئے۔
تفصیلات کے مطابق ایرانی فوجی مشقوں کے دوران خلیج عمان میں میزائل کو ہدف کی طرف فائر کیا گیا لیکن وہ قریب ہی موجود ایران کی سپورٹ شپ کو جا لگا جس کے نتیجے میں 19 اہلکار جان کی بازی ہار گئے جبکہ 15 زخمی ہوگئے۔
واقعہ خلیج عمان پر تہران کے جنوب مشرق میں واقع جسک پورٹ کے قریب پیش آیا جہاں 10 مئی کو جسک اور چاہ بہار کے پانی میں نیوی کی مشقیں جاری تھیں اور اس دوران سپورٹ شپ میزائل کا نشانہ بن گئی۔
ایران کے سرکاری میڈیا نے واقعے کو حادثہ قرار دیتے ہوئے کہا کہ جہاز اپنے ہدف کو نشانہ بنا رہا تھا کہ شپ ہدف کے انتہائی قریب تھی جس سے واقعہ پیش آیا۔
مسلسل انکار کے بعد ایران کا بڑا اعتراف، یوکرین طیارہ میزائل کا نشانہ بنا
یاد رہے کہ رواں سال 11 جنوری کو ایران نے یوکرین کے مسافر طیارے کو غلطی سے نشانہ بنانے کا اعتراف کیا تھا۔ ایران کا کہنا تھا کہ یوکرین کا مسافر طیارہ نادانستہ طور پر حملے کا نشانہ بنا۔
