تہران: ایرانی مسلح افواج کے چیف آف اسٹاف میجر جنرل عبدالرحیم موسوی نے اعلان کیا ہے کہ اسرائیل پر مزید حملے جاری رکھے جائیں گے۔
ایران کی مہر نیوز ایجنسی کی رپورٹ کے مطابق میجر جنرل عبدالرحیم موسوی نے پاسداران انقلاب کی ایرو اسپیس فورس کے ایک اڈے کا دورہ کیا جہاں انہوں نے مسلح افواج کے بلند حوصلے اور بھرپور تیاریوں کی تعریف کی۔
ایران اسرائیل کشیدگی سے متعلق تمام خبریں
اس موقع پر میجر جنرل عبدالرحیم موسوی نے کہا کہ خدا کی مدد سے ہم غاصب صیہونی حکومت کے کسی بھی ہدف پر مسلسل حملہ کریں گے، ہمیں اپنے آگے کوئی رکاوٹ نظر نہیں آتی۔
سربراہ ایرانی مسلح افواج نے جارحیت کے جواب میں اسرائیلی اہداف پر کیے جانے والے تباہ کن اور درست حملوں کیلیے پاسداران انقلاب کی ایرو اسپیس فورس کی بھی تعریف کی۔
واضح رہے کہ بدھ کے روز پاسداران انقلاب نے اپنے بیان میں کہا تھا کہ مسلح افواج نے اسرائیل میں اہداف پر ایک نئی قسم کے طاقتور میزائل داغے ہیں۔
بیان میں کہا گیا تھا کہ دشمن پر طاقتور سیجل میزائل فائر کیے جو دو مرحلوں، طویل فاصلے تک مار کرنے والے اور انتہائی تباہ کن ہیں۔
علاوہ ازیں، ایران کے نائب وزیر خارجہ ماجد تخت روانچی نے کہا ہے کہ اگر امریکا نے ایران پر حملہ کرنے میں اسرائیل کا ساتھ دینے کا فیصلہ کیا تو تہران کے پاس جوابی کارروائی کے سوا کوئی چارہ نہیں ہوگا۔
ایرانی نائب وزیر خارجہ مجید تخت روانچی کا سی این این کو انٹرویو میں کہا ہم جوہری ہتھیاروں پر یقین نہیں رکھتے، اگر امریکا نے ایران پر حملہ کرنے میں اسرائیل کا ساتھ دینے کا فیصلہ کیا ہیں، تو ہمارے پاس جوابی کارروائی کے سوا کوئی چارہ نہیں ہے۔
انہوں نے کہا کہ جہاں بھی ہمیں ہدف نظر آئے گے، ہم کارروائی کریں گے یہ بات بالکل واضح اور سیدھی ہے، کیونکہ ہم صرف اپنے دفاع میں کارروائی کریں گے۔
