سعودی عرب میں حج کی سعادت حاصل کرنے کے بعد مزید ایرانی حجاج وطن واپسی کے لیے مدینہ منورہ سے عرعر پہنچ گئے ہیں۔
سعودی خبر رساں ادارے کی رپورٹ کے مطابق ایرانی حجاج کو مدینہ منورہ کے پرنس محمد بن عبد العزیز ایئرپورٹ سے عرعر پہنچادیا گیا ہے۔
سعودی حکام کے مطابق ایرانی حجاج کی محفوظ وطن واپسی کے لیے عرعر سے بری راستہ وطن واپس روانہ کیا جارہا ہے۔
رپورٹس کے مطابق ایرانی حجاج نے سعودی حکومت کا بہترین میزبانی اور سہولتوں کی فراہمی پر شکریہ ادا کیا ہے۔
عمرہ ویزا کیلئے پالیسی مزید سخت:
سعودی عرب کی وزارت حج و عمرہ نے نئے عمرہ ویزا کیلئے اپنی پالیسی سخت کردی ہے جو نافذ العمل ہو چکا ہے۔
وزارت حج و عمرہ نے اعلان کیا ہے کہ عمرہ کے خواہشمند بین الاقوامی افراد کو صرف اس وقت ہی ویزا جاری کیا جائے گا جب ان کی رہائش کی بکنگ ”نسک مسار”ڈیجیٹل پلیٹ فارم پر درج ہو گی۔
عرب میڈیا کے مطابق سعودی حکومت کی نئی ہپالیسی کے تحت تمام عمرہ سروس فراہم کنندگان، کمپنیوں اور بین الاقوامی ایجنٹس کو پابند کیا گیا ہے کہ وہ زائرین کے لیے صرف وزارت سیاحت سے لائسنس یافتہ ہوٹلوں میں رہائش کا انتظام کریں اور اس کی مکمل تفصیلات نسک مسار پلیٹ فارم پر اپ لوڈ کریں۔
وزارت حج و عمرہ نے واضح کیا کہ جو ادارے اس فیصلے پر عمل نہیں کریں گے، انہیں ویزہ تاخیر یا ریگولیٹری جرمانوں کا سامنا کرنا پڑ سکتا ہے، یہ فیصلہ 10 جون 2025 سے نافذ العمل ہو چکا ہے۔
یہ پالیسی سعودی عرب کے ویژن 2030 کا حصہ ہے، جس کا مقصد مذہبی سیاحت کے شعبے کو جدید ٹیکنالوجی اور اعلیٰ معیار کی خدمات کے ساتھ ترقی دینا ہے۔
مناسک حج کے بعد ہزاروں حجاج مدینہ منورہ پہنچ گئے
نسک مسار پلیٹ فارم اب زائرین کے لیے عمرہ خدمات کا مرکزی ڈیجیٹل گیٹ وے بن چکا ہے، جہاں سے وہ نہ صرف ویزہ اور رہائش کی بکنگ کر سکتے ہیں بلکہ مختلف زبانوں میں تعلیمی رہنمائی بھی حاصل کر سکتے ہیں۔
