اسرائیلی فوج کی جانب سے گزشتہ روز دارالحکومت تہران کے قلب میں ایک اور ایرانی نیوکلیئر سائنسدان کے قتل کی تصدیق کی گئی ہے۔
غیر ملکی ذرائع ابلاغ کے مطابق ایک اسرائیلی اہلکار کا کہنا تھا کہ یہ قتل ایک ڈرون کے ذریعے کیا گیا۔ سائنسدان کو ان کے اپارٹمنٹ سے دوسرے مقام کی طرف لے جایا گیا تھا۔
اسرائیلی میڈیا رپورٹس کے مطابق اہلکار نے انکشاف کیا کہ ڈرون نے اس شخص کو اس وقت نشانہ بنایا جب انہیں ان کے اپارٹمنٹ سے دارالحکومت میں کسی دوسرے گھر میں لے جایا گیا۔ اہلکار نے اپنا نام ظاہر کرنے سے انکار کیا۔
ایرانی میڈیا رپورٹس کے مطابق گیشا کے پڑوس میں ایرانی عینی شاہدین نے ایک شخص کو عمارت کے اوپر سے گرتے ہوئے دیکھا۔
دوسری جانب اسرائیلی فوج کی جانب سے دعویٰ کیا جارہا ہے کہ ایرانی حمایت یافتہ لبنانی تنظیم حزب اللّٰہ کے انفرااسٹرکچر سائٹ کو نشانہ بنایا ہے۔
اسرائیل نے لبنان کے جنوبی شہر ناقورہ کے قریب لبنانی تنظیم حزب اللّٰہ کے انفرااسٹرکچر سائٹ پر حملہ کیا ہے۔
اسرائیلی فوج کے مطابق گزشتہ رات اسرائیلی بحریہ نے جنوبی لبنان کے علاقے ناقورہ میں حزب اللّٰہ کی رضوان فورس کے انفراسٹرکچر سائٹ کو نشانہ بنایا تھا۔
اسرائیلی فوج کا کہنا ہے کہ یہ مقام حزب اللّٰہ کی جانب سے اسرائیلی شہریوں کے خلاف دہشت گردانہ حملوں کی تیاری کے لیے استعمال کیا جا رہا تھا۔
ایران اسرائیل کشیدگی سے متعلق تمام خبریں
یاد رہے کہ لبنانی تنظیم حزب اللّٰہ کی انفرااسٹرکچر سائٹ کو ایسے وقت میں نشانہ بنایا گیا ہے جب گزشتہ روز اسرائیلی وزیر دفاع نے حزب اللّٰہ کو ایران اسرائیل جنگ میں شمولیت سے خبردار کیا تھا۔
