ایرانی حجاج کرام کو لے کر سعودی عرب سے پہلا قافلہ آج روانہ ہوگا، خادم حرمین شریفین کی ہدایت پر ایرانی حجاج کیلئے خصوصی انتظامات کیے گئے ہیں۔
اے آر وائی نیوز کی رپورٹ کے مطابق سعودی وزیر حج و عمرہ ڈاکٹر توفیق بن فوزان الربیعہ نے اپنے ایرانی ہم منصب سے ٹیلی فون پر بات چیت کی۔
اس گفتگو میں حج اور عمرہ میں شرکت کرنے والے ایرانی زائرین کی تیاریوں کے ساتھ ساتھ وسیع تر دوطرفہ تعلقات پر گفتگو کی گئی۔
گفتگو میں ایرانی حجاج کی واپسی کے انتظامات پراطمینان کا اظہار کیا گیا، سعودی وزیر نے کہا کہ ایرانی حجاج کی روانگی کا عمل بخیر و خوبی جاری ہے۔
ان کا کہنا تھا کہ مکہ المکرمہ اور مدینہ سے حجاج کی روانگی کا آغاز ہو چکا ہے، خادم حرمین شریفین کی ہدایت پر ایرانی حجاج کیلئے خصوصی انتظامات کیے گئے ہیں۔
اس موقع پر ایرانی عہدیدار نے سعودی قیادت اور وزیر حج کا شکریہ ادا کیا۔ یاد رہے کہ سعودی عرب سے پہلا ایرانی حجاج کرام کا قافلہ آج روانہ ہوگا۔
سعودی ذرائع ابلاغ کے مطابق پہلے مرحلے میں حجاج کے پہلے گروپ کو مدینہ منورہ کے امیر محمد بن عبدالعزیز انٹرنیشنل ایئرپورٹ سے عرعر ایئرپورٹ پہنچایا گیا ہے۔ایرانی حجاج کو عرعر بارڈر کراسنگ کے ذریعے ایران روانہ کیا جا رہا ہے۔
یاد رہے وزارتِ حج و عمرہ نے سعودی قیادت کی ہدایت پر عمل کرتے ہوئے مکہ اور مدینہ میں موجود ایرانی حجاج کی دیکھ بھال کے لیے ہنگامی بنیادوں پرآپریشن سینٹر قائم کیا ہے۔
