تہران : ایران کے سابق صدر محمود احمدی نژاد نے امریکی صدر ڈونلڈ ٹرمپ کے نام ایک کھلا خط لکھا، جس میں محمود احمدی نژاد نے ڈونلڈ ٹرمپ کی ویزے پر پابندی کے اقدام اور خواتین سے متعلق رویہ پر تنقید کی جبکہ امریکا کے سیاسی نظام پر تنقید کا خیرمقدم بھی کیا۔
احمدی نژاد اپنے خط امریکی صدر کو مخاطب کرتے ہوئے کہا کہ ٹرمپ آپ نے سچائی کے ساتھ امریکی سیاسی نظام اور انتخابی ڈھانچے کو بدعنوان قرار دیا ہے۔
احمدی نژاد نے یہ خط انگریزی اور فارسی زبان میں لکھا۔
سابق ایرانی صدر نے سات مسلم ممالک کے شہریوں پر عائد کردہ ویزے کی پابندی پر ٹرمپ کو تنقید کا نشانہ بنایا، جس میں ایران بھی شامل ہیں، انھوں نے لکھا ہے کہ مختلف اقوام سے تعلق رکھنے والے سائنس دانوں اور اشرافیہ بہ شمول میرے دس لاکھ سے زیادہ ایرانی ہم وطنوں نے امریکا کی ترقی میں اہم کردار ادا کیا ہے، عصرِ حاضر کا امریکہ سارے ملکوں کا ہے۔
خطے کے بیشتر مضمون میں سابق ایرانی صدر نے ڈونلڈ ٹرمپ کو خبردار کیا ہے کہ کہ وہ مشرق وسطیٰ میں امریکا کی مداخلت کا سلسلہ بند کردیں اور سابق امریکی حکومتوں کے رعونت بھرے انداز سے بھی اپنا ناتا توڑ لیں۔
خط کے آخر میں احمدی نژاد نے خواتین کے احترام سے متعلق امریکی صدر کو کہا کہ تاریخ کی عظیم شخصیات نے ہمیشہ خواتین کو بلند احترام دیا ہے اور ان کی خداداد صلاحیتوں کا اعتراف کیا ہے۔
خیال رہے کہ ماضی میں احمدی نژاد سابق امریکی صدور براک اوباما اور جارج ڈبلیو بش ، چانسلر انجیلا میرکل کو کھلے خط روانہ کر چکے ہیں۔
