اسلام آباد: وفاقی وزیر داخلہ محسن نقوی نے اسلام آباد کرائم اینڈ انٹرئیر رپورٹرز ایسوسی ایشن کے نومنتخب عہدیداران سے حلف لے لیا۔
حلف برداری کی تقریب وزارت داخلہ میں منقعد ہوئی۔ اس موقع پر چئیرمین شکیل قرار، وائس چئیرمین نعیم جنجوعہ، صدر قمر المنور اور سیکرٹری جنرل ذوالقرنین حیدر نے حلف اٹھایا۔
حلف اٹھانے والوں میں سنئیر نائب صدر عادل تنولی، نائب صدور نعیم اصغر، بلال آفریدی، سیکرٹری انفارمیشن ناصر بٹ اور سیکرٹری خزانہ ثاقب سید بھی شامل ہیں۔
اس موقع پر محسن نقوی نے تمام نومنتخب عہدیداران کو مبارکباد دیتے ہوئے کہا کہ کرائم اینڈ انٹرئیر رپورٹرز اور وزارت داخلہ کو چولی دامن کا ساتھ ہے، رپورٹرز اسلام آباد میں کریمنل مافیا کی نشاندہی کریں۔
انہوں نے کہا کہ امید ہے ایسوسی ایشن پیشہ وارانہ صحافت کو پروان چڑھانے میں اپنا کردار ادا کرے گی۔
محسن نقوی نے صحافیوں کی دوران کوریج حفاظت یقینی بنانے کی یقین دہانی بھی کروائی۔
