اسلام آباد : وزیرخزانہ اسحاق ڈار نے آئی ایم ایف سے قرض پروگرام کی بحالی کے لیے برطانوی وزیر سے مدد مانگ لی، برطانوی سفیر آئی ایم ایف سے پروگرام بحالی کیلئے بات چیت کریں گے۔
تفصیلات کے مطابق آئی ایم ایف سے قرض پروگرام کی بحالی کے لیے وزیر خزانہ اسحاق ڈار متحرک ہوگئے ، ذرائع نے بتایا کہ وزیرخزانہ اسحاق ڈار کی برطانیہ کے وزیرمملکت برائے خارجہ سے ورچوئل میٹنگ ٓہوئی، جس میں اسحاق ڈار نے اینڈریو مچل کو9 ویں جائزے متعلق آئی ایم ایف مذاکرات پرپیشرفت سے آگاہ کیا۔
Finance Minister Senator Mohammad Ishaq Dar held a virtual meeting with H.E Mr.Andrew Mitchell,Britain’s Minister of State in Foreign,Commonwealth & Development Office(FCDO) and discussed the economic situation of Pakistan as well as progress regarding on-going IMF talks. pic.twitter.com/RcipX7D0K7
— Ministry of Finance (@FinMinistryPak) June 20, 2023
وزیرخزانہ نےحکومت کےمشکل معاشی حالات میں کیےجانےوالےفیصلوں سےآگاہ کرتے ہوئے کہا کہ آئی ایم ایف سے معاہدے کرنے میں مدد کی درخواست کی اور کہا پاکستان نےتمام پیشگی اقدامات بروقت مکمل کرلیے ہیں۔
برطانوی وزیر نے وزیرخزانہ کو آئی ایم ایف سے معاہدہ کیلئے تعاون کی یقین دہانی کرادی ہے، وہ آئی ایم ایف سے پروگرام بحالی کیلئے بات چیت کریں گے۔
اینڈریو مچل نے اصلاحات کے ذریعے معاشی استحکام سےمتعلق پاکستانی اقدامات کااعتراف کرتے ہوئے برطانوی حکومت کی جانب سے پاکستان کومسلسل حمایت اور مدد کا یقین دلایا اور یونان کشتی حادثےمیں پاکستانی شہریوں کی اموات پرگہرے دکھ کااظہار کیا۔
خیال رہے پاکستان کے اسٹاف لیول معاہدے کے لئے آئی ایم ایف کے ساتھ مذاکرات کامیاب نہ ہو سکے، معاہدہ ختم ہونے میں صرف 10 روز باقی ہیں۔
ذرائع وزارت خزانہ نے بتایا تھا کہ آئی ایم ایف کو ایکسٹرنل فنانسنگ اور بجٹ پر تحفظات دور کرنے میں کامیاب نہیں ہوئے، مذاکرات کامیاب نہ ہونے کے بعد وزیرخزانہ نے مختلف ممالک کے سفیروں سے ملاقاتیں کی۔
وزیر خزانہ نے مختلف ممالک کے سفیروں کو آئی ایم ایف کے ساتھ مذاکرات سے آگاہ کیا ، وزیرخزانہ کی سفارش پر مختلف ممالک کے سفیر بھی آئی ایم ایف سے بات چیت کریں گے۔