اسلام آباد : امریکی وزیر خارجہ مارکو روبیو نے پاکستان کے نائب وزیر اعظم اور وزیر خارجہ اسحاق ڈار سے ٹیلیفونک گفتگو کی ہے جس میں اہم امور پر تفصیلی بات چیت کی گئی۔
ترجمان امریکی محکمہ خارجہ نے بتایا کہ وزیر خارجہ روبیو نے داعش خراسان کے کارندے محمد شریف اللہ کی گرفتاری اور امریکا کے حوالے کرنے پر پاکستان کا شکریہ ادا کیا۔
دونوں رہنماؤں نے انسداد دہشت گردی کے شعبے میں تعاون جاری رکھنے کی اہمیت پر زور دیا۔ وزیر خارجہ روبیو نے قانون نافذ کرنے والے اداروں سے تعاون اور غیرقانونی امیگریشن کے مسئلے سے نمٹنے میں پاکستان کے کردار کی اہمیت کو بھی اجاگر کیا۔
دونوں رہنماؤں نے پاکستان پر امریکی جوابی محصولات اور تجارت میں توازن اور انصاف کے فروغ کیلئے پیش رفت کے امکانات پر تبادلہ خیال کیا۔
روبیو نے اہم معدنیات کے حوالے سے ممکنہ تعاون اور امریکی کمپنیوں کے لیے تجارتی مواقع کو وسعت دینے میں دلچسپی ظاہر کی۔
روبیو اور اسحاق ڈار نے یو این سلامتی کونسل میں پاکستان کی دو سالہ غیر مستقل رکنیت کے دوران عالمی چیلنجز سے نمٹنے کیلئے مل کر کام کرنے کے عزم کا اظہار بھی کیا۔
