اوٹاوا: کینیڈا کے شہر ٹورنٹو میں ہونے والے حملے کی ذمہ داری عالمی دہشت گرد تنظیم داعش نے قبول کرلی۔
تفصیلات کے مطابق دو روز قبل کینیڈا کے شہر ٹورنٹو کی ڈینفوٹ اور لوگان ایوینو پر نامعلوم مسلح شخص نے فائرنگ کردی تھی، جس کے نتیجے میں خاتون سمیت دو افراد ہلاک ہوئے تھے۔
غیر ملکی خبر رساں ادارے کے مطابق کالعدم شدت پسند تنظیم داعش کی جانب سے مذکورہ حملے کی ذمہ داری قبول کرلی گئی ہے، واضح رہے کہ ٹورنٹو حملے میں متعدد افراد زخمی بھی ہوئے تھے۔
عسکریت پسند تنظیم نے اپنے ایک بیان میں کہا ہے کہ حملہ آور کو خاص مقصد کے لیے بھیجا گیا تھا، جبکہ داعش نے حملے سے متعلق کوئی ثبوت پیش نہیں کیا۔
ٹورنٹو میں نامعلوم شخص کی فائرنگ، ایک خاتون ہلاک، متعدد افراد زخمی
خیال رہے کہ مذکورہ حملے کے بعد ٹورنٹو پولیس نے سماجی رابطے کی ویب سائٹ ٹویٹر پر ٹویٹ کے ذریعے شہریوں کو آگاہ کیا تھا کہ واقعے میں خاتون سمیت دو افراد ہلاک جبکہ 14 افراد زخمی ہیں، زخمیوں میں ایک بچی کی حالت تشویش ناک بتائی گئی تھی۔
واضح رہے کہ پولیس ذرائع نے یہ بھی کہا تھا کہ مسلح شخص نے خود کو گولی مارنے سے قبل پولیس پر بھی فائرنگ کی تھی۔
علاوہ ازیں پولیس ترجمان نے کہا تھا کہ حملے کی تحقیقات جاری ہیں، تاہم ابھی تک یہ معلوم نہیں ہوسکا ہے کہ حملے کی وجہ کیا تھی۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
