اسلام آباد : پولیس اور ڈاکوؤں کے درمیان فائرنگ کے تبادلے کے نتیجے میں 2 ڈاکو ہلاک جبکہ 3 اہلکار زخمی ہوگئے۔
تفصیلات کے مطابق وفاقی دارلحکومت میں سہالا کے قریب ڈکیتی کی وارداتوں میں ملوث بلال گینگ اور پولیس کے درمیان مقابلہ ہوا، فائرنگ کے تبادلے میں ایک پولیس اہلکار اور اے ٹی ایس کے 3 اہلکار زخمی ہوگئے۔
ترجمان کا کہنا ہے کہ ڈاکو ایک گھرمیں محصور ہوگئے، پولیس نے گھر کو گھیرے میں لے لیا، سینئرافسران بھی موقع پرموجود تھے ، جوابی فائرنگ میں 2 ڈاکو بھی ہلاک ہوئے۔
پولیس کے مطابق بدنام زمانہ بلال گینگ کے ارکان اسلام آباد کے ایف 8 آئی سیکٹر میں ایک گھر میں ڈکیتی کی کوشش کے بعد فرار ہو رہے تھے۔
پولیس کا کہنا تھا کہ تھانہ سہالا کے پوش علاقے میں ڈاکوؤں نے گھرکرائےپرلے رکھاتھا، ڈاکو وارداتوں کے بعد چھپنے کیلئےمکان استعمال کرتے تھے۔
آئی جی یونس نے کہا کہ "بلال گینگ اسلام آباد کے پوش علاقوں میں کئی ڈکیتیوں میں ملوث رہا ہے، جہاں سے انہوں نے لاکھوں کی نقدی، زیورات اور مہنگی گاڑیاں لوٹی ہیں۔
پولیس ترجمان نے بتایا کہ زخمی پولیس اہلکاروں کو علاج کے لیے راولپنڈی اسپتال منتقل کردیا گیا ہے، سینے میں گولی لگنے والے ایک پولیس اہلکار کی حالت تشویشناک ہے۔
خیال رہے پاکستان میں متعقد ہونے والی او آئی سی سمٹ 2021 کی وجہ سے دارالحکومت میں سیکیورٹی ہائی الرٹ ہے۔
