اسلام آباد : اسلام آباد ایئرپورٹ مسائل کا گڑھ بن گیا، وزیراعظم کی قائم کردہ سٹیزن پورٹل میں شکایتوں کی بھرمار ہو گئی، ایئرپورٹ منیجرسے وضاحت طلب کرلی گئی۔
اسلام آباد ایئرپورٹ پر آنے والے مسافروں کو مختلف مراحل میں کافی پریشانیوں کا سامنا کرنا پڑرہا ہے، وزیراعظم کی قائم کردہ سٹیزن پورٹل میں شکایتوں کی بھرمار ہو گئی۔
بیرون ملک سے آنے والے مسافروں نے شکایتوں کے انبار لگادیئے۔ سٹیزن پورٹل کے لکھے گئے خط کی کاپی اے آروائی نیوز کو موصول ہوگئی۔
اس حوالے سے ذرائع کا کہنا ہے کہ سٹیزن پورٹل نے مسافروں کی شکایت کا نوٹس لے لیا ہے، مذکورہ شکایات پر اسلام آباد ایئرپورٹ منیجرسے وضاحت بھی طلب کرلی گئی۔
سٹیزن پورٹل ذرائع کے مطابق مجموعی طور پر14 میں سے12شکایات اسلام آباد ایئرپورٹ کے خلاف موصول ہوئیں، مینوئل کے مطابق شکایات کا جواب اور حل21روز میں بھی نہیں دیا گیا۔
اٹھارہ روز گزرنے کے باوجود ایئرپورٹ منیجر سمیت متعلقہ عملہ صحیح طریقے سے کام نہیں کررہا، سٹیزن پورٹل انتظامیہ نے ہدایت دی ہے کہ شہریوں کی شکایات اور اس کے حل کیلئے ذمہ داری کا مظاہرہ کیا جائے۔
